Ўзбекистонда маъмурий суд тизими давлат органларини тийиб турувчи институтга айланиши лозим. Бу фикр Тошкент давлат юридик университети катта ўқитувчиси Серикбек Муратаев томонидан билдирилди.
28—29 май кунлари Тошкент давлат юридик университети ва Германия халқаро ҳамкорлик жамияти томонидан «Бугунги Ўзбекистонда оммавий ҳуқуқ ривожланишининг тенденциялари: конституциявий ва маъмурий ҳуқуқнинг мунозарали саволлари»га бағишланган илмий-амалий симпозиум ўтказилди.
Симпозиумда қатнашган Серикбек Муратаевнинг «Дарё» мухбири Мусулмонбек Иброҳимовга берган интервьюсида таъкидлашича, бугунги кунда маъмурий судлар аксарият ҳолларда маъмурий жавобгарликка тортиш тўғрисидаги ишларни кўриб чиқиш билан чекланиб қолмоқда. Фуқаролар ҳам ушбу судлов органини фақат жарима ёки майда ҳуқуқбузарликларга жазо тайинловчи тузилма деб билади.
«Аслида эса суд ҳокимиятининг мазкур бўғини давлат бошқарув органларини назорат қиладиган, хатосини тузатадиган ва камчиликка йўл қўйган бўлса, фуқаро томонида туриб, таъсир чораларини қўллайдиган институтга айланиши лозим», — деди юридик фанлар номзоди Муратаев.
Унинг айтишича, маъмурий суд институти 1863 йилдан буён амалда бўлган Германия тажрибаси Ўзбекистондаги ушбу соҳа олдида турган муаммоларга ечим бўла олади.
«Германияда маъмурий судларнинг давлат органларига таъсири жуда кучли. Уларда бошқарув органларининг раҳбарлари ‘маъмурий судларга ишимиз тушмасин’ деб, хавотирда туради ва муаммоларга ўз вақтида ечим топишга ҳаракат қилади. Чунки мамлакатда маъмурий бошқарув органи билан фуқаролар ўртасидаги ўзаро муносабатларга тез ечим топилади. Судга бирор мурожаат келиб тушдими, қонунда белгиланган тартибда, жуда қисқа муддатда — 10 кун, нари борса, 15 кунда жавоб берилади. Барчаси ортиқча қоғозбозлик ва югур-югурлардан холи», — дейди олим.
Ўзбекистонда маъмурий суд институти 2017 йилда ташкил этилган, 2019 йил январидан «Маъмурий тартиб-таомиллар тўғрисида»ги қонун кучга кирган. Лекин мансабдорлар ҳали бу қонун, бу ўзгаришларнинг моҳиятини тушуниб етаётгани йўқ, деб ҳисоблайди Муратаев.
«Давлат органларининг мансабдор шахслари бу қонуннинг мазмун-моҳиятини тўлиқ тушуниб етганича йўқ. Қонун ҳали ўзининг 30 фоиз самарасини ҳам бериб улгурмади. Чунки бизда қонунни кучга киритиш механизмини яраташ мақсадида қонуности ҳужжатлари кўпайиб кетмоқда. Вазирлик ва идораларнинг йўриқномалари, қарорлари шулар жумласидан. Амалиётда қонуности ҳужжатларнинг кўпи фуқароларга нотаниш, буни ҳамма ҳам билавермайди ва, айниқса, уни исталган вақтда топиб бўлмайди. Шунинг учун қонунларни тўғридан-тўғри ва бевосита кучга киритишни йўлга қўйиш бўйича таклифлар ишлаб чиқилмоқда», — дея қўшимча қилди у.
Изоҳ (0)