Андижон шаҳридаги Пиёзпоя кўчасида Тошкентга қатновчи машиналарнинг автотураргоҳи бор. Шу ердаги ҳайдовчиларнинг бири вилоят давлат хавфсизлик хизмати бошқармасининг эътиборини тортди. Аниқроғи жорий йилнинг 25 майида фуқаро У.А. ўзига тегишли бўлган Nexia автомашинасида ўтирса-да, шубҳали кўринди. Тезкор ходим холислар иштирокида автомашина салонидаги спорт сумкасини текширганда, ундан ўткир ҳидли, тўқ яшил жигарранг тусли модда топилади. Бу ҳақда ДХХ вакиллари «Дарё»га маълум қилди.
Терговга қадар текширув давомида У.А. 2019 йил февралида Қирғизистон Республикаси Ўш шаҳрига бориб, эски танишидан «гашиш» гиёҳвандлик моддасини Ўзбекистонга олиб кириб, ҳар килограммини 4,5 минг доллардан сотишга келишиб олганлиги аниқланди. 2019 йил 24 май куни Фарғона вилояти ҳудудидаги айланма йўллар орқали Андижонга ўтиб келиб, юқоридаги манзилда кутиб турган У.А.га спорт сумкасидаги «юк»ни ташлаб кетади.
Иш бўйича тайинланган суд-кимёвий экспертизасининг хулосасига кўра, автомашинадаги сумкадан олинган далил ҳақиқатда ҳам гашиш гиёҳвандлик моддаси бўлиб, соф оғирлиги 5 килограмм 650 граммга тенг эканлиги тасдиғини топди. Ҳозирда жиноят иши қўзғатилиб, дастлабки тергов ҳаракатлари олиб борилмоқда.
Изоҳ (0)