The New York Times газетаси АҚШ ҳарбий денгиз кучлари (ҲДК)нинг мамлакат шарқий соҳилларидаги парвозлар вақтида номаълум учар жисмларга дуч келган учувчилари билан суҳбатлашди. Америкалик журналистлар ҳарбийларнинг «Ҳаво таҳдидларини кенг кўламли таниб олиш дастури» ҳақида аввал ҳам ёзган, айнан шу дастур доирасида НУЖлар билан учрашув каби ҳодисалар ўрганилган. Ушбу дастур ёпилгани айтилганди, бироқ, The New York Times’нинг ёзишича, дастур «бошқача шакллар»да ҳамон амалда.
Номаълум жисмлар Виржинияда жойлашган ВФА-11 эскадриляси учувчилари томонидан қайд этилган. Бу 2014—2015 йилларда, улар Форс кўрфазига жўнаб кетиш олдидан ўқув парвозларини амалга оширган вақтда юз берган. Учувчиларнинг айримларнинг The New York Times билан исмини ошкор этмаслик шарти билан гаплашган, икки учувчи эса шахсини яширмаган — булар лейтенант Райан Грэйвз ва Дэнни Аккойн.
Газетанинг ёзишича, учувчилар F/A-18 Super Hornet қирувчи-бомбардимончи самолётларидаги 1980 йилларга мансуб радарлар замонавийларига алмаштирилганидан кейин ғалати объэктларни пайқай бошлаган. Аввалига улар радар кўрсатмаларини ёлғон деб ўйлаган, шунингдек, объектларнинг ўзини кўрмаган. Лейтенант Аккённинг сўзларига кўра, радар биринчи марта учар жисмни қайд этганида, у шлемига ўрнатилган камера орқали уни кўролмаган. Орадан бир неча кун ўтиб, у НУЖни нишонга олиб, инфрақизил спектрда қайд этишга муваффақ бўлган, лекин объектни барибир ўз кўзлари билан кўрмаган.
Грэйвзнинг айтишича, объектлар турли баландликларда пайдо бўларди — баъзан денгиз сатҳида, баъзан ундан тўққиз километргача юқорида. Улар бирдан секинлашар ёки бирдан тез ҳаракат қилишни бошларди, айрим вақтларда ҳатто гипертовуш тезлигида учарди. Жисмларнинг двигатели бор-йўқлиги сезилмаган, инфрақизил спектрда эса улардан газ чиқаётгани кўринмаган. Лейтенантнинг қайд этишича, бу аппаратлар жуда кўп қувват сарфлаган, лекин 12 соатлаб — «биз кутганимиздан 11 соат кўпроқ» ҳавода бўлган.
Номаълум учар жисмларнинг АҚШ ҲДК учувчилари томонидан олинган видеоси
Аввалига учувчилар бу объектларни янги дронларни тайёрлаш бўйича махфий дастурнинг бир қисми, деб ўйлаган, бироқ 2014 йил охирида икки самолёт НУЖ билан тўқнашиб кетишига бир баҳя қолганидан сўнг, бу фикрдан қайтган. Грэйвзнинг сўзларига кўра, хизматчилардан бири бошқа самолётдан 30 километр масофада учгани ва шу вақт икки самолёт орасидан объект учиб ўтганини айтган — у худди куб ичига қамаб қўйилган шарга ўхшаш жисмни кўрган. Эскадриля аъзолари ҳукумат учувчиларнинг ҳаётини хавф остига қўйиб, ҳарбийлар машғулот ўтказаётган жойда дронларни синовдан ўтказиши мумкин эмас, деган фикрга келган ва раҳбариятга ҳодиса ҳақида ҳисобот юборган. Форс кўрфазига жўнатилганидан сўнг, бу учувчилар НУЖларга қайта дуч келмаган.
Учувчилар The New York Times’га берган интервьюларида ўзлари кўрган НУЖларнинг қаердан пайдо бўлгани ҳақидаги тахминларни айтишдан бош тортган. Астрофизик Леон Голуб газета учун берган изоҳида таъкидлашича, бу жисмларнинг ўзга сайёраларга мансублиги эҳтимоли жуда кам — унинг айтишича, бу ё қурилмалардаги носозлик, ёки атмосфера ҳодисаларидан тортиб юқори тезликдаги парвоз вақтида юз берадиган «неврологик юкламалар» ҳосиласи бўлиши мумкин.
Изоҳ (0)