Шаҳрисабз шаҳридаги ишсиз ва банд бўлмаган аҳолини касб-ҳунарга ўқитиш маркази — KOICA’да мактаб битирувчилари учун очиқ эшиклар куни бўлиб ўтди. Шаҳрисабз туман халқ таълими бўлими ташаббуси билан ташкил этилган очиқ эшиклар кунида марказ имкониятлари хусусида ўқувчиларга маълумот берилди. Бу ҳақда «Дарё» мухбири хабар бермоқда.
Маълум бўлишича, KOICA’да талабаларнинг ўқиш муддати 10 ой бўлиб, шундан 4 ойи корхоналарда амалиёт ўташ билан ўтади. Ўқиш даврининг дастлабки 6 ой мобайнида талабаларга бандликка кўмаклашиш марказлари томонидан энг кам ойлик иш ҳақи миқдорида стипендия тўлаб борилади.
KOICA маркази Вазирлар Маҳкамасининг 2017 йил 14 мартдаги қарорига асосан Корея Республикасининг 8,5 миллион АҚШ долларлик грант маблағи эвазига барпо этилган бўлиб, бир вақтнинг ўзида 480 нафар талабага таҳсил бериш имкониятига эга. Қўшни туманлардан келган ўқувчилар учун 60 ўринли ётоқхона ҳам мавжуд.
– Мактабимиз битирувчиларини ушбу марказ фаолияти билан таништиришдан мақсад, касб-ҳунар ўрганишга қизиқиши бўлган ёшларни ушбу даргоҳда таълим олишга чорлашдан иборат, — дейди Шаҳрисабз туман халқ таълими бўлими мудири Шуҳрат Рўзиев. — Ўқувчиларимизнинг касб-ҳунарли бўлиб, элимиз корига ярайдиган мутахассис бўлиб етишидан манфаатдормиз.
Шаҳрисабз туман Халқ таълими бўлими ўқув ишлаб чиқариш мажмуалари фаолиятини методик таъминлаш ва ташкил этиш шўъбаси мудири Жамолиддин Пўлатовнинг маълумот беришича, жорий ўқув йилида Шаҳрисабз туманидаги мавжуд 85 та мактабнинг 3862 нафар ўқувчиси 14 та касб бўйича ўқув ишлаб чиқариш мажмуаларида таълим олди.
Изоҳ (0)