Ёшлар иттифоқи қошидаги Ўзбекистон ёшлари умумжаҳон ассоциацияси делегациясининг Афғонистонга сафари ниҳоясига етди. Бу ҳақда «Дарё»га Ёшлар медиа маркази маълум қилди.
Делегация вакиллари Балх вилояти, Нахри-Шахи туманида жойлашган, 2014-йилда фойдаланишга топширилган Заҳириддин Муҳаммад Бобур номидаги ўзбек мактаби фаолияти билан яқиндан танишиб, унда таълим олаётган ёшларга 176 та китоб ва дарсликлар ҳамда 600 дан ортиқ тарқатма материалларни совға қилди. Балх ва Жужзон олий таълим муассасаларининг ўзбек тили ва адабиёти кафедрасида таълим олаётган талабаларга ҳам 358 та ўзбек адабиёти намуналари тақдим этилди.
Балх вилояти ҳокими ўринбосари Шужоуддин Шужо билан учрашувда Ўзбекистон ёшлари умумжаҳон ассоциацияси делегацияси раҳбари Муродилла Алимбоев Ўзбекистонда ёшларга оид амалга оширилаётган давлат сиёсати, уларни қўллаб-қувватлаш, ҳуқуқ ва қонуний манфаатларини ҳимоя қилиш, Ёшлар иттифоқининг мақсад ва вазифалари хусусида батафсил маълумот берди.
Шужоуддин Шужо Ўзбекистон делегациясига Балх ва Сурхондарё вилоятларининг ёшлар ташкилотлари билан мунтазам ва ўзаро ҳамкорлик муносабатларини ўрнатиш, афғонистонлик ёшларнинг ҳам Ўзбекистон ёшлар иттифоқи томонидан уюштириладиган тадбирларда иштирокини йўлга қўйиш таклифларини билдирди.
Бундан ташқари, Мозори Шариф шаҳрида Ўзбекистон ёшлари умумжаҳон ассоциациясининг этник ўзбеклар билан ўтказган очиқ мулоқотида ёшларга ўзбек тилини Skype орқали онлайн тарзда ўргатиш, ўзбек-афғон маданий маркази очилиши, Самарқанд, Бухоро ва Хива каби қадимий шаҳарларга афғонистонлик ёшларнинг саёҳатларини уюштириш масалалари муҳокама этилди.
Изоҳ (0)