Лондон расталарида, хусусан, шаҳардаги Ғарбий халқаро бозор (Westeren International Market)да Ўзбекистон—Британия савдо-иқтисодий муносабатлари тарихида илк бор 25 май куни Ўзбекистоннинг Наманган вилоятида етиштирилган янги гилослар пайдо бўлди, дея хабар бермоқда «Дунё» агентлиги.
Western International Market жаҳоннинг турли бурчакларидан етказиб берилган янги мева-сабзавот маҳсулотларини сотиш билан шуғулланувчи Лондондаги энг йирик улгуржи бозорлардан биридир. Ўзбекистон гилосини Британияга импорт қилган AKS Services Group компанияси бош директори Воис Каис ушбу кунни тарихий деб атади.
«Бугун — тарихий кун. Тарихда илк бор ўзбек гилоси Британия бозорига етказиб берилди. Ўзбекистон ажойиб мамлакат ва бир неча ой аввал биз Ўзбекистон мева-сабзавот маҳсулотларини Буюк Британияга экспорт қилиш бўйича иш бошлашга қарор қилдик. Мен Ўзбекистоннинг кўплаб ҳудудларида, хусусан, Қашқадарё вилоятининг Китоб туманида ва Наманган вилоятида бўлдим», — дейди Каис.
Унинг сўзларига кўра, AKS Services Group компанияси таҳлиллар ўтказган, импорт учун Британия тарафи талаби бўйича сертификатлаштириш ва стандартлаштириш, санитар ва фитосанитар назорат бўйича барча жараёнлардан ўтган. Барча тестлар аъло таъм сифатини ва маҳсулот калибровка, саралаш ва қадоқлаш бўйича талабларга мувофиқлигини кўрсатган.
«Маҳсулотнинг биринчи партияси синов тариқасида етказиб берилган эди, энди бизнинг режаларимиз катта. Ҳажмни ошириб, Ўзбекистондан олиб келинадиган мева-сабзавот маҳсулотлари турини кўпайтирмоқчимиз. Анор, пиёз, бодринг ва турли қуруқ меваларни экспорт қилиш бўйича режалар бор», — деди Каис. AKS Services Group’нинг техник директори Карим Мерчанд ҳам ўтказилган барча лаборатория тестлари маҳсулот сифати юқорилигини тасдиқлаган.
Компания вакиллари берган маълумотга кўра, яқин вақт ичида Буюк Британияга мавсумий мева ва сабзавотлар — Қашқадарё ва Тошкент вилоятларидан пиёз, бодринг, анор, хурмо, шунингдек, қуруқ меваларнинг ҳар хил турларини импорт қилиш кўзда тутилган.
Изоҳ (0)