«Реал» Серхио Рамос ўрнига номзодларни топиб қўйди

«Реал» сардори Серхио Рамос жамоани тарк этиши эҳтимоли сабаб мардидликлар ҳимояни кучайтириш бўйича вариантларни ўрганмоқда, дея хабар беради AS.

Мадрид клуби раҳбарияти 33 ёшли испаниялик футболчи ўрнига 4 та номзодни кўриб чиқади.

«Реал» анчадан буён «Наполи» вакили Калиду Кулибалига қизиқиш билдирмоқда. Италияликлар африкалик футболчи трансферидан 120 миллион евро ишлаб олишни кўзлаган. Аввалроқ неаполликлар «Қироллик клуби»нинг 90 миллион евролик таклифини рад этгани ҳақида хабар берилганди.

«Аякс» сардори Маттейс де Лигтга ҳам таклиф билан чиқиш варианти йўқ эмас. Амстердам клуби уни 70 миллион еврога баҳоламоқда. «Барселона» ўйинчини сотиб олишга яқин турибди, бироқ мадридликларнинг музокараларга аралашиши учун ҳали вақт бор.

Мазкур рўйхатда Виржил ван Дейк варианти ҳам мавжуд. Аммо нидерландиялик билан келишувга эришиш мураккаб. «Ливерпуль» ўйинчини қўйиб юбормоқчи эмас ва унинг учун камида 100 миллион евро талаб қилиши мумкин.

Аввалроқ «Реал» «Атлетико» аъзоси Хосе Ҳименесни сотиб олишни мўлжаллаётганди, бироқ клубнинг азалий рақиби бўлган «матрасчилар» футболчи билан янги шартнома имзолади ва товон пулини 60 миллиондан 100 миллионга ошириб қўйди.

«Реал»да «Эспаньол»дан Марио Эрмосони 7,5 миллион еврога қайтариб олиш вариант ҳам мавжуд. Бундан ташқари унинг шорт-листидан Милан Шикриняр («Интер» — 60 миллион евро) ҳамда Антонио Рюдигер («Челси») ҳам ўрин эгаллаган.