Намангандаги Заҳириддин Муҳаммад Бобур номидаги маданият ва истироҳат боғида анъанавий «Гуллар байрами» бошланди. Бу ҳақда «Дарё» мухбири хабар бермоқда.
Байрамни гулларга бурканган автомобиллар карвони бошлаб берди.
100 дан ортиқ турли русумдаги машиналар Наманган халқаро аэропортидан шаҳар марказидаги боғ сари йўл олди.
Улар қаторида кўплаб ретро автомобилларни ҳам кўриш мумкин эди.
—Гуллар автокарвонида 10 нафар аёл ҳайдовчи иштирок этяпмиз, — дейди «Водители Намангана» гуруҳи иштирокчиси Марина Жабборова. — Ўзим ўқитувчиман, машина минишга қизиқаман, гулларга ҳам меҳрим баланд. Бошқарувимдаги Lacetti автомобилини шойи матолар ва алвон атиргуллар билан безадим. Бу шаҳримиздаги ажойиб айёмга қўшган кичик ҳиссам бўлди.
Маълумот учун, бу йил 59-маротаба ўтказилаётган ушбу байрам 26 майдан 1 июнга қадар давом этади.
Изоҳ (0)