Namangandagi Zahiriddin Muhammad Bobur nomidagi madaniyat va istirohat bog‘ida an’anaviy “Gullar bayrami” boshlandi. Bu haqda “Daryo” muxbiri xabar bermoqda.
Bayramni gullarga burkangan avtomobillar karvoni boshlab berdi.
100 dan ortiq turli rusumdagi mashinalar Namangan xalqaro aeroportidan shahar markazidagi bog‘ sari yo‘l oldi.
Ular qatorida ko‘plab retro avtomobillarni ham ko‘rish mumkin edi.
—Gullar avtokarvonida 10 nafar ayol haydovchi ishtirok etyapmiz, — deydi “Voditeli Namangana” guruhi ishtirokchisi Marina Jabborova. — O‘zim o‘qituvchiman, mashina minishga qiziqaman, gullarga ham mehrim baland. Boshqaruvimdagi Lacetti avtomobilini shoyi matolar va alvon atirgullar bilan bezadim. Bu shahrimizdagi ajoyib ayyomga qo‘shgan kichik hissam bo‘ldi.
Ma’lumot uchun, bu yil 59-marotaba o‘tkazilayotgan ushbu bayram 26-maydan 1-iyunga qadar davom etadi.
Izoh (0)