Бухоро марказида кейинги уч йил ичида шаҳар ичидаги шаҳар —«Bukhara City» бунёд этилиши кўзда тутилган. Бу ҳақда хабар «Дарё» мухбири хабар бермоқда.
Халқаро анъанавий «Ипак ва зираворлар» фестивали доирасида «Бухоро спорт» мажмуасида «Bukhara City» ишбилармонлар ҳудуди қурилишининг бошланишига бағишланган маросим бўлиб ўтди. Унда йигирма мингдан ортиқ томошабин, чет эллик сайёҳлар, халқаро дипломатик корпус вакиллари, олимлар ва соҳа мутахассислари иштирок этди.
Тантанали маросими Бухоро вилояти ҳокимининг табрик сўзи билан очилди. «Studio Vertebra» компанияси бош архитектори Меҳмед Бекташ эса ўз сўзида ҳамкорликдан миннатдорлигини билдирди.
Бухоро шаҳридаги Зулфия, «Саноатчилар» ҳамда Қаюм Муртазоев кўчалари орасидаги 46 гектар майдонда «Bukhara City» бунёд этилиши режалаштирилган. Шу пайтгача бу ерда мавжуд бўлган ишлаб чиқариш корхоналари бошқа манзилга кўчирилади.
— Лойиҳанинг умумий қиймати 225 миллион АҚШ долларини ташкил этади. Мазкур лойиҳани тузишда хавфсизлик, йўлларда тирбанд бўлмаслик ва илғор хорижий меъморчилик ютуқларини ўрганиб, қўллаган ҳолда барпо этиш асосий мезон қилиб белгиланган. Лойиҳага кўра, ҳар бир қарич ер ҳисоб-китоб қилиниб, 32 та лотга бўлинади. Меҳмонхона, музейлар, кутубхона, бизнес марказлари, савдо мажмуалари, конференция заллари, ресторан ва маданий марказлар, кўп қаватли уйлар ва сунъий ҳовузлар, фавворалар қурилади,— деди Бухоро шаҳри ҳокими Карим Камолов.
Гала-концертга эл суйган ҳофизлар, эстрада хонандалари ҳамда таниқли сўз усталари ташриф буюрди.
Изоҳ (0)