АҚШнинг Ўзбекистондаги янги элчиси Даниэл Розенблюм Тошкентга келди ҳамда ўз фаолиятини бошлади.
ТИВ матбуот хизматининг хабар беришича, элчи бугун, 24 май куни Ўзбекистон ташқи ишлар вазири Абдулазиз Комилов билан учрашган.
Вазир элчининг ишонч ёрлиқлари нусхаларини қабул қилар экан, уни самимий қутлади ва масъулиятли вазифасини бажаришда муваффақиятлар тилади.
Суҳбат давомида Ўзбекистон Республикаси Президенти Шавкат Мирзиёевнинг 2018 йил май ойида АҚШга расмий ташрифи ҳамда олий ва юқори даражадаги музокаралар чоғида эришилган келишувларни амалга ошириш нуқтайи назаридан Ўзбекистон-АҚШ муносабатларини чуқурлаштириш истиқболлари муҳокама қилинди.
Музокараларда сиёсий, савдо-иқтисодий, инвестицион, маданий-гуманитар ва бошқа соҳалардаги икки томонлама ҳамкорликни янада ривожлантиришдан икки томон ҳам манфаатдор эканлиги тасдиқланди.
Учрашувда халқаро ва минтақавий аҳамиятга молик айрим масалалар ҳам муҳокама қилинди.
Аввалроқ, АҚШнинг янги элчиси Ўзбекистон халқига ўзбек тилида мурожаат қилгани ҳақида хабар берилган эди.
Изоҳ (0)