Аввал хабар берганимиздек, UniRank агентлиги томонидан тайёрланган Ўзбекистоннинг энг яхши олий таълим муассасалари рейтинги эълон қилинганди.
Вазирлар Маҳкамаси ҳузуридаги Таълим сифатини назорат қилиш давлат инспекциясига кўра, фақат ОТМнинг веб сайти ва унга неча нафар одам кирганлиги билан аниқланган рейтинг натижалари таълим сифатини тўғри баҳолай олмайди. Шунингдек, рейтинг натижаларини эълон қилган ҳар қандай агентлик ёки ташкилот ҳам жаҳон ҳамжамияти томонидан тан олинган бўлавермайди.
Рейтинг натижаларини эълон қилаётган вақтда рейтингни амалга оширган ва баҳо берган халқаро агентликларнинг бу соҳага қанчалик чуқур ёндашгани ва қайси мезонлар асосида аниқлаганига ҳам эътибор қаратиш айни муддао.
Маълумот учун, UniRank агентлигининг мақсади жаҳон университетлари ва коллежларининг жаҳон миқёсида онлайн таниқлилиги ва алоқаларнинг онлайн мавжудлигига асосланган.
Шунингдек, чет эллик талабалар ва ўқитувчиларга махсус олий таълим муассасасининг бошқа давлатда қанчалик машҳурлигини тушунишларига ёрдам бериш учун мўлжалланган. Ушбу ташкилот рейтингида олий таълим муассасаларининг таълим сифати, академик хизматлари, ўқув ва илмий фаолият асосий мезонлар сифатида қабул қилинмаган.
Инспекциянинг қайд этишича, Ўзбекистонда миллий олий таълим муассаслари рейтингини шакллантиришда дунёнинг илғор рейтинг тизимлари чуқур таҳлил қилиб чиқилди ва рейтинг тизимини баҳоловчи индикаторлардан миллий таълим тизмига мос келадиганлари ўрганилиб танлаб олинди.
Хусусан, THE (Times Higher Education), QS (Quacquarelli Symonds), ARWU (Academic Ranking of World Universities) каби йирик рейтинг агентликлари услубларини ўрганган ҳолда 23 та энг муҳим ва мос индикаторлар танлаб олинди. 2018 йилда Таълим сифатини назорат қилиш давлат инспекцияси томонидан 57 та олий таълим муассасаси фаолияти таҳлил қилиниб, натижалари эълон қилинганди.
Изоҳ (0)