Инсон ҳуқуқлари бўйича Миллий марказ директори, академик Акмал Саидов прокуратура органлари ходимлари инсон ҳуқуқлари бўйича стандартларни билиши давр тақозоси эканлигини таъкидлади. У бу ҳақда Бош прокуратура Академияси томонидан ўтказилган «Ҳуқуқни муҳофаза қилиш соҳасида илмий ва таълим салоҳиятини ошириш: мавжуд тенденциялар ва истиқболлар» мавзусидаги халқаро конференциядаги чиқишида айтиб ўтди.
«Прокуратура органлари назорат қилувчи эмас, инсон ҳуқуқларини ҳимоя қилувчи орган ҳисобланади. Яъни ҳар бир фуқаронинг ҳуқуқларини тиклаш прокуратуранинг асосий вазифаларидан биридир. Инсон ҳуқуқлари бўйича Миллий марказ ва Бош прокуратура Академияси ўртасида ҳамкорлик бўйича меморандум имзоланган. Бу меморандумдан асосий мақсад — инсон ҳуқуқлари бўйича таълим ишларини янада такомиллаштириш», — деди Акмал Саидов.
Конференцияда 50 дан зиёд хорижий экспертлар, хусусан, 21 та давлат ва 11 та халқаро ташкилотнинг амалиётчилари, хорижий муассаса ва ташкилотларнинг раҳбарлари ва масъул ходимлари ҳам қатнашди.
Малайзиянинг Ўзбекистондаги элчиси Ҳенди Ассаннинг таъкидлашича, Бош прокуратура Академияси билан Малайзия коррупцияга қарши курашиш академияси (MASA) ҳамкорлиги доирасида ўзбекистонлик офицерлар MASAда малака ошириб келмоқда.
«Шу кунларда коррупцияга қарши курашиш бўйича малайзиялик мутахассис ўзбекистонлик прокуратура органлари ходимлари учун бир нечта тренинглар ўтказади», — деди элчи.
Тўртта тематик сессия иши натижаларига кўра, ҳуқуқни муҳофаза қилиш соҳасидаги илмий ва таълим салоҳиятини ошириш, идоралараро ва халқаро ҳамкорликни мустаҳкамлашга қаратилган тавсиялари қабул қилинди.
Бош прокуратура Академияси учрашувлар якунида Туркия Адлия академияси, Украина прокуратурасининг Миллий академияси, Қирғизистон Бош прокуратурасининг Прокурор ходимларини касбий тайёрлаш маркази билан ҳамкорлик тўғрисида келишувга эришди.
Шунингдек, амалий машғулот ва масофавий таълим учун барча зарур шароитлар яратилган Бош прокуратура Академиясининг янги биносининг очилиши бўлиб ўтди.
Изоҳ (0)