Индонезия президенти оммавий тартибсизликлар иштирокчиларини огоҳлантирди

Индонезия президенти Жоко Видодо президент сайлови натижалари эълон қилинганидан сўнг Жакартада бошланган оммавий тартибсизлик ташкилотчилари ва иштирокчиларини жиддий оқибатлардан огоҳлантирди. Бу ҳақда «ТАСС» хабар берди.

«Ҳуқуқ-тартибот кучлари оммавий тартибсизликка сабабчи бўлганларга қарши барча зарур чора-тадбирларни кўради. Қуролли кучлар ва полиция қонунга мувофиқ ҳаракат қилади», — деган Видодо.

У, шунингдек, «ҳукумат хавфсизликни, демократик жараёнлар ва давлатнинг бирлигини бузадиган шахслар билар муроса қилмаслигини» таъкидлаган. Бундан ташқари, президент Индонезия аҳолисини содир бўлган воқеадан хавотирга тушмасликка чақирган.

Эслатиб ўтамиз, Жакартада норозилик намойишлари 17 апрель куни президент сайлови натижалари эълон қилинганидан сўнг бошланган эди. Мамлакат Марказий сайлов комиссияси маълумотларига кўра, амалдаги президент Жоко Видодога 55,5 фоиз сайловчи овоз берган. Унинг ягона рақиби Правобо Субианто эса 44,5 фоиз овоз тўплаган.

Мухолифатчи номзод штаби сайлов натижаларидан норози эканлигини ва Конституциявий судга шикоят қилишини билдирган. Уларнинг сўзларига кўра, сайлов вақтида, кейинчалик овозларни ҳисоблашда амалдаги президентнинг ғолиб бўлишига ёрдам бераётган тизимли ва қўпол хатога йўл қўйилган.

Қайд этилишича, тунги тартибсизликлар оқибатида камида олти киши ҳалок бўлган, 200 дан ортиқ киши жароҳатланган.