Ҳиндистон космик тадқиқотлар ташкилоти (ISRO) 22 май куни ҳар қандай об-ҳавода, ҳатто қуюқ булутли шароитда ҳам ер юзасини кузатиш имконини берувчи RISAT-2B сунъий йўлдошини орбитага мувафаққиятли учирди. Бу ҳақда «ТАСС» хабар берди.
Оғирлиги 615 килограмм бўлган сунъий йўлдош ортилган PSLV-C46 ракета ташувчиси Бенгал кўрфазининг Шрихарикота оролида жойлашган космодромдан маҳаллий вақт билан соат 05:30 да (Тошкент вақти билан 05:00 да) учирилган. Сўнг қурилма белгиланган орбитага олиб чиқилган.
Ҳиндистон ҳарбий ҳаво кучларининг «Мираж-2000» қирувчи-бомбардимончиси 26 февраль куни Покистон ҳудудидаги «Жаиши Муҳаммад» террорчилик ташкилоти лагерига ҳужум қилган эди. Ўшанда Ҳиндистон томони кўп сонли террорчилар йўқ қилинганини билдирган. Аммо Покистон у ерда ҳеч қандай лагер бўлмагани, Ҳиндистон самолётлари ўрмонли тоғ ён-бағирларини бомбардимон қилиб, табиатга зарар етказганини маълум қилган. Осмонни қуюқ булутли қоплаганлиги сабабли Ҳиндистон сунъий йўлдоши ҳужум натижаларини исботловчи суратларни ололмаган.
Ҳиндистон ОАВларининг маълум қилишича, энди янги сунъий йўлдош билан 26 февралдагидек ҳолатлар такрорланмайди — энг замонавий радар билан жиҳозланган янги сунъий йўлдош аниқ маълумотлар олиш ва исталган об-ҳаво шароитида ҳаракатларни кузатишга ёрдам беради.
Изоҳ (0)