Украина Давлат тергов бюроси давлат ҳокимияти амалдорларига қарши давлатга хиёнат қилиш ва суд ваколатларини суиистеъмол қилиш моддалари бўйича жиноий иш қўзғатди. «Корреспондент.net»нинг хабар беришича, бу ҳақда тегишли маълумот 21 май куни DTB сайтида чоп этилди.
«Давлат тергов бюроси марказий аппарати инспекторлари томонидан 2019 йилнинг 21 май куни Андрей Портнов аризасига кўра, Судгача тергов ягона реестрига Украина давлат органларида алоҳида масъулиятли лавозимларни эгаллаган мансабдор шахслар томонидан Украина Жиноят кодексининг 109 (конституциявий тузумни мажбуран ўзгартириш ёки ағдариш, ёҳуд давлат ҳокимиятини эгаллашга қаратилган ҳаракатлар), 111 (давлатга хиёнат) ва 426-моддасининг биринчи қисмида назарда тутилган (ҳарбий хизматчиларнинг ўз хизмат ваколатларини суиистеъмол қилиши) жиноятларни содир этгани эҳтимоли юзасидан маълумотлар киритди», — дейилади хабарда.
Гап 2018 йилнинг 25 ноябрида содир бўлган воқеа ҳақида бормоқда. Унда Украина Ҳарбий денгиз кучларининг учта кемаси Россия чегарсини кесиб ўтиб Керч бўғозига қараб йўл олган эди.
Украина Давлат тергов бюросига аризани Собиқ президент Виктор Янукович администрациясининг собиқ раҳбари ўринбосари Андрей Портнов берган. Бу ҳақда унинг ўзи Telegram-каналида маълум қилган. У аризада Порошенкони 2018 йилнинг 25 ноябрь воқеаларига оид бир қатор жиноятларда айблаган.
Изоҳ (0)