Индонезия мухолифати уч кун ичида президент сайлови натижаларидан арз қилиши мумкин

Индонезия президентига мухолифатчи номзод Прабово Субианто уч кун ичида сайлов натижаларидан шикоят қилиш учун Конституцион судга мурожаат этиши мумкин. «ТАСС»нинг хабар беришича, бу ҳақда Марказий салов комиссияси раиси Ариф Будиман 17 апрель кунидаги сайлов натижаларини эълон қилаётганида айтган.

«Агар Субианто вакиллари олий судлов органига мурожаат қилмаса, 24 майда сайлов ғолиби (мамлакатнинг амалдаги раҳбари) Жоко Видода 2019—2024 йилларга Индонезия президенти деб эълон қилинади», — деган Будиман.

МСК раиси 21 май куни сайлов натижаларига кўра, Видидо 55,5 фоиз овоз тўплаганини, унинг ягона рақиби Субианто эса 44,5 фоиз овоз олганини маълум қилди.

Шу билар бирга, натижалар эълон қилинганидан сўнг мухолифатчи номзод тарафдорлари тақдим этилган сайлов натижалари якуний баённомасини имзолашдан бош тортди. Аввалроқ Субианто «овозларни ҳисоблаб чиқишда амалдаги президентнинг ғолиб бўлишига ёрдам бераётган тизимли ва қўпол хатога йўл қўйилаётгани»ни айтган.

Кутилганидек, сайлов натижалари 22 май куни эълон қилиниши керак эди. МСК эса, эҳтимол, мухолифатчилар тарафдорларининг оммавий чиқишидан хавотир олиб, сайлов натижаларини бир кун аввал эълон қилишга қарор қилган.

Режалаштирилаётган норозилик акциясини «Исломни ҳимоя қилиш ҳаракати 212» вакиллари ташкиллаштирмоқда. Улар ўтган ҳафтадан бошлаб мамлакатнинг турли шаҳарларидан акция иштирокчиларини йиғишни ва уларни Жакартага юборишни бошлаган.

Бу ҳаракат ҳар хил исломий гуруҳларни, жумладан радикалларни бирлаштирган норасмий ташкилотдир.