17 май куни Бердақ номидаги Қорақалпоқ давлат университетида «Ҳарбий хизматчиларнинг маънавий баркамол авлодни тарбиялашдаги ўрни ва роли» мавзусида республика илмий-амалий анжуман бўлиб ўтди. Бу ҳақда Мудофаа вазирлиги матбуот хизмати «Дарё»га маълум қилди.
Унда Шимолий-ғарбий ҳарбий округ қўшинлари қўмондони полковник Д.Чориев, Қорақалпоқ давлат университети филология фанлари номзоди, профессор М.Худойберганов, фалсафа фанлари номзоди, доцент А.Байриева, Мудофаа вазирлиги марказий аппарати офицерлари, 300 нафардан ортиқ ўқувчи-ёшлар ва ҳарбий хизматчилар иштирок этди.
Анжуманни ўтказишдан мақсад ёшлар ўртасида ҳарбий хизматнинг нақадар шарафли ва масъулиятли касб эканлигини тарғиб қилиш, мамлакат мудофаа қобилиятини кучайтириш ҳамда янада мустаҳкамлаш йўлида амалга ошириладиган ишлар тўғрисида маълумот беришдан иборат.
Анжуман якунида ўқувчи ёшлар эътиборига Ўзбекистон армиясида фойдаланилаётган замонавий қурол-аслаҳа намуналари ҳавола этилди.
Бундан ташқари ҳарбий хизматчилар учун Нукус гарнизони Маънавият ва маърифат марказида Бердақ номидаги Қорақалпоқ давлат университети талабалар театр-студияси томонидан «Кўкдаги орзулар» номли спектакли намойиши этилди. Маҳорат билан ижро этилган саҳна кўриниши барчада ажойиб таассурот қолдирди.
Муддатли ҳарбий хизматчилар ўртасида ўтказилган «Тафаккур» ўйинлари эса аскарларнинг кенг дунёқараш ва билимга эга эканлигини яна бир бор исботлади. Фаол иштирокчиларга жаҳон ҳамда ўзбек мумтоз адабиёти намоёндаларининг машҳур асарлари тўплами совға қилинди.
18 май куни эса Нукус шаҳрининг марказий кўчалари бўйлаб ҳарбий хизматчилар ва уларнинг оила аъзолари ҳамда аҳоли иштирокида «Саломатлик» акцияси ўтказилди. Шимоли-ғарбий ҳарбий округ қўшинлари қўмондони бошчилигида ўтказилган мазкур тадбирда 500 нафардан ортиқ ҳарбийлар ўз оилалари 5 км масофани пиёда босиб ўтишди.
Таъкидлаш керакки, сўнгги йилларда мамлакат аҳолиси ўртасида соғлом турмуш тарзини тарғиб этишга катта эътибор қаратилмоқда. Жумладан, бу каби акция ўтган ҳафта Мудофаа вазирлиги ташаббуси билан пойтахтда ҳам ўтказилган эди.
Изоҳ (0)