Россияги Доғистон давлат тиббиёт университети ректори Сулейман Маммаев бошчилигидаги делегация вакиллари – ушбу олий таълим муассасасининг стоматология факультети декани Тагир Абакаров, халқаро ҳамкорлик бўйича масъул Сажида Хаджалиевалар Андижон давлат тиббиёт институтига ташриф буюрди. Бу ҳақда институт матбуот котиби «Дарё»га хабар берди.
Мазкур олийгоҳлар ўртасида имзоланган шартномада қайд этилган вазифаларни амалга ошириш, узоқ муддатли ва самарали ҳамкорликни мустаҳкамлаш мақсадида келган доғистонлик меҳмонлар АДТИ симуляцион ўқув марказида бўлиб, бу ердаги шарт-шароитлар, талабаларнинг фантом, муляж ва стимуляторлар билан ишлаш жараёнларини кўздан кечирди. Институт илмий кенгашлар залида профессор-ўқитувчилар, магистрантлар, клиник ординаторлар ва талабалар билан илмий мулоқот ҳам ўтказилди. Шунингдек, делегация аъзолари институт клиникасининг 2–жарроҳлик бўлимидаги даволаш ишлари, ўқув хоналари ва яратилган шарт-шароитлар билан танишгач, беморларга зарур маслаҳатлар берди.
Учрашув давомида ҳар икки томон вакиллари ҳамкорлик шартномаси, «Йўл харитаси» бўйича ўқув дастурларини ташкил этиш, «3+2» ўқитиш тизимининг ташкилий томонлари, 2019-2020-ўқув йили учун стоматология факультетига абитуриентларни қабул қилиш қўшма ўқув дастури, талабаларнинг ўқиш тўлов контракт миқдори ва келгусидаги режалар хусусида келишиб олди.
Изоҳ (0)