15 май куни Тошкентда «Ўзатом» агентлиги ва «Росатом» давлат корпорациясининг қўшма лойиҳаси – Атом технологиялари бўйича ахборот марказининг очилиш маросими бўлиб ўтди. Бу ҳақда «Дарё» мухбири Севара Нишонова хабар берди.
Тадбирда «Росатом» давлат корпорацияси бош директори Алексей Лихачёв, Ўзбекистон Республикаси фанлар академияси президенти Беҳзод Йўлдошев, Россия Федерациясининг фавқулодда ва мухтор элчиси Владимир Тюрденев ҳамда Ўзбекистон ва Россия атом тармоқлари вакиллари, ОАВ ходимлари ҳамда мактаб ўқувчилари иштирок этди.
Ахборот маркази Ўзбекистон аҳолисига атом нима эканлиги, АЭС қандай ишлаши, атом технологиялари қайси ноэнергетик соҳаларда қўлланилиши ва кўпгина бошқа масалалар бўйича билим берувчи майдон бўлади.
Марказ экспозицияси турли ёшдаги ташриф буюрувчилар учун мўлжалланган: мактаб ўқувчилари, талабалар ва ёши катталар.
Таъкидлаб ўтиш жоизки, марказ фаолияти нотижорий бўлиб, ташриф ва барча маънавий тадбирлар марказ меҳмонлари учун бепул. Марказ майдонида олимларнинг оммавий маърузалари ўқилади, атом тармоғи мутахассислари билан учрашувлар ва шу билан боғлиқ турли тадбирлар ташкил этилади.
«Ахборот марказининг очилиши – Ўзбекистонда илк атом электр станциясини барпо этиш бўйича комплекс лойиҳани амалга оширишнинг муҳим қисми. Ишончимиз комилки, атом инфратузилмасини таркиб топтириш ва ривожлантириш барча мамлакатларда жамиятнинг катта қисми томонидан қўллаб-қувватланади. Жамоатчилик томонидан қўллаб-қувватлашини шакллантиришда асосий рол тарғибот-ташвиқот ишларига тегишли. Айнан шунинг учун Атом технологиялари бўйича ахборот марказлари ташкил этилади», – дейди «Росатом» давлат корпорацияси бош директори Алексей Лихачёв.
«Тошкентдаги Атом технологиялар бўйича ахборот маркази ҳар бир инсон ядро энергетикаси бўйича саволларга жавоб олиши, билимларнинг янги саҳифасини очиши, инсониятнинг энг долзарб эҳтиёжларини қаноатлантиришини таъминлаш, унинг роли қандай эканлигини билиш имконини берадиган жойга айланади», — деб таъкидлади Ўзбекистион Республикаси Фанлар академияси Президенти Беҳзод Йўлдошев.
Ўзбекистонда очилган Ахборот маркази дунёниинҳг бошқа мамлакатларида жойлашган шундай марказларнинг энг замонавий ва илғори ҳисобланади.
У шундай лойиҳалаштирилганки, бу ерга ташриф буюрувчи ҳар бир инсон тинчлик атоми ҳақида турли аудиовизуал технологиялар ёрдамида ахборот олиши учун имконият яратилган. У замонавий мультимедиа жиҳозлари — ўзбек ва рус тилларидаги ноодатий видеодастурлар, қишлоқ хўжалиги соҳасида атом технологияларини қўллаш имкониятини намойиш қиладиган интерфаол доскалар ва албатта, Ўзбекистонда қуриладиган атом станциясининг макети билан таъминланган
Видеозалда атом энергетикаси, реакторларнинг хавфсизлик тизимлари ва турли соҳаларда атом технологияларини қўллаш ҳақида турли илмий-оммабоп фильмларни томоша қилса бўлади.
Изоҳ (0)