Марказий банк ва VISA халқаро тўлов технологиялари компанияси Ўзбекистонда рақамли тўлов инфратузилмасини ривожлантириш дастурларини биргаликда амалга ошириш бўйича ўзаро англашув ва ҳамкорлик меморандумини имзолади.
Меморандумга кўра, томонлар Ўзбекистонда рақамли тўловлар инфратузилмасини биргаликда яратиш, янги рақамли тўлов маҳсулотларини жорий этиш йўли билан электрон тўловларни қабул қилиш тармоғини кенгайтириш ва рақамли тўловларни ривожлантиришга қаратилган меъёрий ҳужжатларни ишлаб чиқишда ҳамкорлик қилади.
Шунингдек, томонлар бутун мамлакат бўйлаб карталарни қабул қилишни кенгайтириш ва электрон тижоратни ривожлантириш дастурларини банклар ва савдо субъэктларига таваккалчиликни бошқаришнинг ишончли воситаларини тақдим этиш орқали амалга оширишга келишиб олди.
Ҳамкорлик доирасида томонлар маҳаллий банклар билан мобил ва электрон тўловлар хавфсизлигини таъминлаш учун карта ҳисоб рақамларини белгилашни (токенлаштириш) жорий этиш, шунингдек, хатарлар ва фирибгарлик операциялари бўйича маълумотлар алмашиш бўйича иш олиб боришни режалаштирмоқда.
Изоҳ (0)