Швеция прокуратураси WikiLeaks асосчиси Жулиан Ассанжга қарши жинсий тажовуз айблови бўйича жиноят ишини қайта очди, деб хабар берди «Эхо Москви».
«Унинг Буюк Британияда қўлга олингани суд ишининг қайта очилишига имкон берди», — деган округ бош прокурори ўринбосари Ева-Мария Перссон.
Швеция прокуратураси Буюк Британия Ассанжни 2019 йилнинг август ойигача эксрадация қилишига умид қилмоқда.
Euronews’нинг маълум қилишича, Ассанж иши бўйича дастлабки суриштирув ишлари 2017 йилнинг май ойида тўхтатилган эди. Ева-Мария Перссон бундай қарор суд иши шароити сабабли эмас, балки Жулиан Ассанжнинг суд залида иштирокини таъминлаш имкони бўлмагани сабабли чиқарилганини айтган.
Эслатиб ўтамиз, Ассанж АҚШнинг Афғонистон ва Ироқда олиб борган ҳарбий операциялари ва Гуантанамо лагерида сақлаш шароитлари ҳақида қатор махфий маълумотларни эълон қилганидан сўнг танилган эди.
Швеция ҳуқуқни муфоҳаза қилиш органлари бир неча йил олдин Ассанж устидан жиноий иш очган. Ассанжнинг ўзи ушбу айблов сохталиги, бу иш уни қамоққа олиш учунгина қилинганини айтиб, бир неча йилдан буён Эквадорнинг Лондондаги элчихонасида сиёсий бошпана берилган шахс сифатида яшаб келаётган эди.
Изоҳ (0)