Францияда тюленларни ўлдиришда гумонланаётган киши қўлга олинди, деб хабар берди The Local.
Бир неча ой олдин Бретандаги пляжларда қийнаб ўлдирилган тюленлар кўзга ташлана бошлади.
Номаълум жиноятчининг ҳаракатлари маҳаллий аҳоли вакилларини дарғазаб қила бошлади. Иш шу даражагача бордики, денгиз фаунасини муҳофаза қилиш жамияти жониворлар қотилини аниқлашга ёрдам берган кишига 10 минг евро мукофот ваъда қилди.
Мукофот пули эълон қилингач, полиция ушбу ҳолат гувоҳларини топишга муваффақ бўлди. Уч киши сўроқ қилинди. Шундан сўнг улардан бири тюленларни ўлдирганликда гумонланиб ҳибсга олинди. У икки йилга озодликдан маҳрум этилиши ва 150 минг еврогача жарима тўлаши мумкин.
Биринчи калласи узилган тюленни февраль ойи ўрталарида Конкарно шаҳрида топишган эди. Жиноятчи тюленнинг калласини арқонга боғлаб, осиб кетган эди.
Орадан бир ой ўтиб, яна бир боши узилган тюленни топишди.
Гумонланувчи маҳаллий балиқчи бўлиб чиқди. У нима сабабдан бу ишни қилгани номаълум. Бироқ бир йил аввал ушбу ҳаракатни содир этган бир гуруҳ балиқчилар денгиз жониворлари уларнинг балиқларини еб қўяётганини маълум қилган эди.
Изоҳ (0)