«Дарё»га Қарши туманининг «Хониён» маҳалласида яшовчи фуқаролардан мурожаат келиб тушди. Мурожаатчиларнинг маълум қилишича, туман аҳолисини табиий газ билан таъминлашда тумангаз ғирром йўлни танлаган. Ҳудуд ва манзил туман марказидан бир хил узоқликда жойлашган бўлса-да, аҳолини табиий газ билан таъминлашда «сиздан угина биздан бугина» деган ақидага амал қилишган.
Аҳолининг тумангаз раҳбариятига қўяётган айблари қанчалик асосли эканлигини билиш ва муаммони жойида ўрганиш мақсадида «Дарё» мухбири Қарши туманининг Хониён маҳалласида бўлди.
— 2016 йил 9 март куни маҳалламиз аҳолисини табиий газ билан таъминловчи газ тармоғидан узилдик, — дейди «Хониён» маҳалласида яшовчи аҳоли вакилларидан бири Адҳам Саидов. – Эртасига, яъни 10 март куни эса буни расмга олдим ва газ нима учун узилганлиги билан қизиқдим. Айтишларича, кун исиб кетгани боис узиб қўйишган бўлиб, қиш мавсуми келганда яна улашар экан. Кўнгил хотиржам бўлди. Аммо минг афсуски газ қайта уланмади. Яна сўраб борсак, «туман ҳокимининг 2016 йил 24 октябрь куни газ босими паст бўлган ҳудудларни табиий газдан узиш тўғрисидаги фармойиши қабул қилинган», дейишди. Айни кунга қадар мурожаат қилмаган ташкилотимиз қолмади. Қаерга борсак, бизга ўша фармойишни кўндаланг қилишади. Ҳолбуки, туман ҳокимининг фармойиши 2016 йил октябрь ойида чиққан, бизнинг маҳалламиз гази эса 2016 март ойида узилган-ку?
Маълум бўлишича, 2015 йилдан эътиборан Қарши тумангаз филиали масъуллари туманнинг «Чўли ота» ҳудудидаги маҳаллаларни табиий газга эҳтиёж кам бўлган пайт — баҳор ва ёз ойларида газ тармоғидан узиб, қиш мавсуми олди улашга одатланган. Аммо 2016 март ойида узилган газ 2018 йил сентябрь ойида «Жумабозор»га қайтиб келса-да, «Хониёнга» келмаган. Бунинг сабаби билан қизиққан фуқароларга эса вилоят ҳокимлигидан бир хил жавоблар кела бошлаган.
Жавоб хатларида мутасаддилар томонидан Қарши туман ҳокимининг 2016 йил 24 октябрдаги 115-Ф сонли фармойиши билан туманнинг бошқа ҳудудлари қатори «Хониён» МФЙдаги 173 та хонадон ҳам табиий газ босими паст бўлганлиги боис 2016 йилнинг ноябрь ойидан эътиборан табиий газдан узилганлиги, айни кунда суюлтирилган газ билан таъминланганлиги айтилади. Аммо ҳеч қайси ташкилот ёки мутасадди фармойишда кўрсатилган «Хониён»даги 173 та хонадондан ташқари («Хониён»да жами 840 та хонадон мавжуд) 667 та хонадон газ билан таъминланганми, нега улар ҳам газ тармоғидан узиб қўйилганлиги ҳақида лом-лим дейишмайди. Бунданам қизиғи туман ҳокими газ босими паст бўлган ҳудудлар газини узиш, узишдан аввал ҳам аҳолини бир ой олдин огоҳлантириш кераклигини айтиб, фармойиш беряпти. Шошқалоқ газчилар эса «Хониён»даги 173 та хонадон эмас, бутун хониёнликларни 2016 йил 9 март куниёқ газдан маҳрум қилишга улгуряпти.
Қарши тумангаз филиали раҳбари Зафар Гуловдан бу ҳолатга изоҳ сўраганимизда, у ўша пайтда раҳбар бўлиб ишламаганлигини, бунинг сабабини билмаслигини баён қилди.
— Нима учун аҳоли туман ҳокими фармойишидан олдин газ тармоғидан узиб қўйилган буни билмайман, — дейди Зафар Гулов. – Чунки ўша пайт тумангазда раҳбар бошқа киши бўлган.
«Хониён» маҳалласидан исми очиқланишини истамаган суҳбатдошлардан бирининг «Дарё» мухбирига маълум қилишича, 2018 йил «Жумабозор» маҳалласига газни қайта улаш учун хонадонлардан 400 минг сўмдан 17 миллион сўм пул йиғилган.
Хониёнлик суҳбатдошнинг бу фикрини «Жумабозор» маҳалласида яшовчи фуқаро ҳам (фуқаронинг исм-шарифи таҳририятга маълум, аммо ўзи истамагани учун очиқламадик) тасдиқлаб шундай деди: «Ҳақиқатдан ҳам газни қишлоқнинг бу бошидан тортиб келамиз дейишгани учун ҳар бир хонадон 400 минг сўмдан пул берганмиз, пулни кўчабоши Рўзимурод ака йиғиб олган».
Ушбу маҳаллада яшовчи Зуҳра Ёрқулова хонадони газ тармоғидан узиб қўйилганлигини кўриб, боисини сўрадик.
— Қўшниларимиз газ учун 400 минг сўмдан пул йиғиб юришган экан, — дейди Зуҳра Ёрқулова. – Аммо бизнинг шароитимиз бўлмагани учун пул беролмадик ва газ бизнинг хонадонга уланмади. Аммо қишда газсиз жуда қийналдик.
Жумабозорлик яна бир суҳбатдош Муса Бозоров хонадони эса газ учун пул йиғилганлигини инкор этди.
— Газ учун ҳеч қандай пул йиғилгани йўқ, — дейди Муса Бозоров. – Мана бизда газ борку, ҳеч кимга пул берганимиз йўқ.
«Дарё» мухбири билан суҳбатлашган собиқ кўчабоши Рўзимурод Ўринбоев «Жумабозор» маҳалласига газ келтириш учун 43 та хонадондан 17 миллион сўм пул йиғилганини тасдиқлади. Ва пул йиғилганлиги тўғрисидаги рўйхатни ҳам тақдим этди.
— 2016 йил март ойида узилган газимиз 2018 йил 15 сентябрда уланди, — дейди Рўзимурод Ўринбоев. — Маҳалладаги 2 та кўча менга қарарди. Шу 2 та кўчадаги 43 та хонадондан 400 минг сўмдан 17 миллион сўм пул йиғдим. Ва қишлоқнинг бу бошидан 400 метрдан ортиқ «труба» тортиб, газни қайта уладик. Қолаверса, йиғилган пул ҳисобидан ишчиларга овқат олиб берганман. Яна бошқа харажатлар ҳам айнан шу пулдан қилинган.
Рўзимурод Ўринбоевга кўра, «Жумабозор»га келиб турган газ тармоғи узилиб, бошқа жойдан 400 метрдан ортиқ «труба» тортилиши «Хониён» маҳалласидагиларга газ бермаслик мақсадида қилинган. Собиқ кўчабоши Рўзимурод Ўринбоевнинг қўшимча қилишича, буни уларга тумангаз ходимлари Шуҳрат Санаев ва Хуршид Зиёдуллаевлар маслаҳат берган.
Маълум бўлишича, 2018 йил сентябрь ойида «Жумабозор» маҳалласидаги хонадонларга газ берилган. МФЙ раисининг маълумот беришича, айни кунда МФЙдаги 520 та хонадон табиий газ билан таъминланган. Яна 185 та хонадон ҳам табиий газга уланиш ниятида. Тумангаз филиали раҳбари Зафар Гуловнинг ҳисоб-китобига кўра эса, айни кунда «Жумабозор»да 345 та хонадонда газ бор. Демакки, ушбу маҳалладаги 175 та хонадон табиий газдан фойдаланиб келаётганлигини ҳатто тумангаз раҳбари ҳам билмайди. Ажабо...
Кўз ўнгида адолатсизликлар бўлаётганига чидай олмаган «Хониён» маҳалласидаги 4–5 та хонадон бошлиқлари ҳам газга уланиш учун югур-югурни бошлаб юборади. Ташкилот раҳбарларига мурожаат йўллайди. Айни воқеалар рўй бераётган пайтда тумангаз ходимлари Шуҳрат Санаев ва Хуршид Зиёдуллаевлар газ ўтказишда ташкилотчилик қилаётган кўчабоши Рўзимурод Ўринбоега маслаҳат беради.
— Шуҳрат Санаев менга «Хониён»даги 4–5 та ёзув-чизув қилиб юрганларга ҳам газ беринг», деди, — дейди Рўзимурод Ўринбоев. — Мен Адҳамларга (Мурожаатчи Адҳам Саидов назарда тутилаяпти) харажатини тўланглар, деб айтдим. Йўқ дейишди. Кейин «райгаз»дагилар «Хониён»даги 5 та хонадон газ олмаган бўлса, трубани кесиб олинг, у ёққа газ бормасин», деди. Кейин мен кесиб олдим. Мана энди газ улатолмай югуриб юрибди.
Журналистик суриштирувларимиз давомида Қарши туман ҳокимининг 2018 йил октябрь ойида тайёрланган, аммо имзоланмаган «Хониён» МФЙдаги 76 та, «Бодомзор» МФЙдаги 108 та ва «Қуйи Бешкент» МФЙдаги 32 та хонадонга табиий газ берилиши кераклиги ҳақидаги фармойиши нусхаси қўлимизга тушиб қолди.
Суриштирсак, хониёнликларнинг дарду-ҳасратига ҳамма ҳам жим қарамаган. «Облгаз» ходимлари ушбу ҳудуд муаммосини ўрганиб чиқиб, аҳолига табиий газ бериш имконияти борлиги ҳақида далолатнома қилган. Ва туман ҳокимлигига агар фармойиш чиқариб беришса, ҳудуд аҳолисини табиий газ билан таъминлаш имконияти борлиги маълум қилинган хат берилган. Қарши тумангаз филиали раҳбари Зафар Гуловнинг гувоҳлик беришича, «Облгаз» ходимлари томонидан тузилган ушбу далолатнома ҳам, туман ҳокимлигига берилган хат ҳам ўринбосарнинг «ўйламай қилган иши» бўлиб чиққан. Алал оқибат яхши ниятда тайёрланган фармойиш ҳоким томонидан имзоланмай қолган. Оқибати эса ўзингизга маълум.
Хониёнлик Ўғил Убайдуллаеванинг айтишича, аҳоли қўйнини пуч ёнғоққа тўлдириш ҳолати 2018 йил декабрь ойида ҳам такрорланган.
— Президентимизнинг вилоятимизга ташрифи кутилаётган пайт республикадан ишчи гуруҳ келди, — дейди Ўғил Убайдуллаева. – Ишчи гуруҳ вакилларига газ муаммосини айтдик. Ўрганишди. Кейин масъуллар «майли, газ трубаларини таъмирланг, газ берамиз» дейишди. Қишлоқдошлар газ «труба»ларни таъмирлаб чиқдик. Ҳамма хурсанд эди. Президентимиз қайтиб кетганларидан сўнг, яна «газ йўқ улаб беролмаймиз», дейишди. Кейин билсак, раҳбарлар бизни ҳеч қаерга мурожаат қилишмасин деб, вақтинча тинчлантириб туриш учун ваъда беришган экан.
Зафар Гуловнинг маълумот беришича, 2014 йил туманда табиий газдан фойдаланувчилар сони 24 минг хонадонни ташкил қилган бўлса, айни кунда туманда 6 мингта хонадон табиий газ билан таъминланган. 6 мингта хонадоннинг 3100 таси 64 та кўп қаватли уйда истиқомат қилади.
Хониёнликларнинг 2016 йил март ойида узилган гази ҳамон улаб берилмаганлиги, «Жумабозор» МФЙдаги 43 та хонадондан 17 миллион сўм пул йиғилиши ҳамда бу жараёнлар кетаётган пайтда воқеалар марказида тумангазнинг 2 нафар ходими кўриниш бергани ва энг ажабланарлиси «Жумабозор» МФЙдаги газ истеъмолчилари сони тумангаз раҳбарияти наздида 345 та-ю, амалда 520 та хонадон эканлиги ҳар қандай кишини таажжублантириши, шубҳалантириши тайин-ку. Хўш бу борада мутасаддилар, ушбу ишга масъул ҳуқуқ посбонлари қандай фикрда?
«Дарё» таҳририяти масъуллардан жавоб кутиб қолади.
Изоҳ (0)