Адлия вазирлиги томонидан 10 май куни ўтказилган «Қонунчиликдаги янгиликлар» брифинги ва матбуот анжуманида ОТМларга ўқишга қабул қилиш, талабалар ўқишини кўчириш, қайта тиклаш ва ўқишдан четлаштириш тартиби тўғрисидаги низомларга киритилган ўзгартириш ва қўшимчалар тўғрисида фикр алмашилди. Бу ҳақда вазирлик матбуот хизмати хабар берди.
«Эндиликда олий таълим муассасаларига ҳужжат топширишда 086-У-шакл бўйича тиббий маълумотнома талаб қилинмайди. Қолаверса, қабул квоталари сонининг эҳтиёждан келиб чиқиб белгиланиши режалаштириляпти», — дейди Олий ва ўрта махсус таълим вазирлигининг Кадрлар тайёрлаш ва битирувчилар тақсимотини мониторинг қилиш бўлими бошлиғи Инатилло Неъматов.
Тадбирда Давлат тест маркази (ДTМ) рухсатномалари қай вақтда олиниши масаласига ҳам тўхталиб ўтилди. ДTМ бош бошқарма бошлиғи Барно Ражабовнинг сўзларига кўра, абитуриентлар 2019 йилдан ДTМ рухсатномаларини бевосита марказ сайтидан юклаб олиши мумкин ва шу асосда тегишли ўқув биносига кириб-чиқиши таъминланиши назарда тутилмоқда.
Шунингдек, матбуот анжуманида киролмай қолган абитуриентлар иккинчи йил ўқишга топшириш учун тўланадиган тўлов миқдори мутахассислар томонидан қайта кўриб чиқилиши юзасидан таклифлар ишлаб чиқилаётгани хусусида фикр билдирилди. Ҳозирда ДTМ тўловни энг кам иш ҳақининг бир баравари (13 май ҳолатига кўра — 202 730 сўм) миқдорида белгилашни таклиф қилмоқда.
Бундан ташқари, ОТМларга қўшимча давлат грантлари асосида имтиҳонсиз ўқишга қабул қилинувчилар қаторига кимлар киритилганлиги ҳақида ҳам маълумотлар бериб ўтилди. Унга кўра:
- Наманган вилояти Тўрақўрғон туманидаги Исхоқхон Ибрат номидаги хорижий тилларга ихтисослашган мактаб-интернатни аъло баҳоларга битирган битирувчилар бакалавриатнинг хорижий тил ва адабиёт, филология ва тилларни ўқитиш йўналишларига;
- ҳар бир ҳарбий қисмдан биттадан ёш ҳарбий хизматчи, қисм қўмондонлиги ва Ёшлар иттифоқи бошланғич ташкилоти тавсияномасига асосан ўқишга қабул қилинади.
Қайд этилишича, сиртқи таълимга ҳужжатлар 1 июлдан 30 июлгача қабул қилинади. Кириш имтиҳонлари 16 августдан 25 августгача камида учта фандан ўтказилади. Ёзма имтиҳонлар шифрланган ҳолда текширилади.
Имтиҳонлар бакалавриат таълим йўналишларига мувофиқ келувчи учта фандан тўпланиши керак бўлган максимал 189,0 баллдан, ҳар бир фаннинг ўрнига қараб унинг учун ажратилган энг кўп баллнинг 0 дан 100 фоизгача бўлган оралиқда баҳоланади. Натижалар имтиҳондан кейин 1-3 кунда таълим муассасасининг расмий сайтида эълон қилинади.
Изоҳ (0)