Тошкент шаҳар ҳокимлигида бўлиб ўтган «Инвестор куни»да 24 нафар тадбиркорга 2,1 триллион сўмлик инвестиция лойиҳаларини амалга ошириш бўйича қарорлар топширилди. Бу ҳақда шаҳар ҳокимлигининг матбуот хизмати хабар берди.
Тошкент шаҳар ҳокимлигида ҳар чоршанба куни ўтказилаётган «Инвестор куни»да шаҳар истиқболига хизмат қиладиган лойиҳалар кўриб чиқилмоқда. 8 май куни бўлиб ўтган тадбирда республика ишчи гуруҳи томонидан маъқулланган 46 нафар тадбиркор саноат корхоналарини очиш, янги турар жой ва хизмат кўрсатиш муассасаларини барпо этишга оид лойиҳалари билан иштирок этди.
46 нафар тадбиркорнинг 24 нафарига умумий қиймати 2,1 триллион сўмлик лойиҳаларини амалга ошириш бўйича Тошкент шаҳар ҳокимининг қарорлари топширилди. Шундан 88,5 миллион доллар тўғридан-тўғри хорижий сармоядир. Шунингдек, жами қиймати 375,3 миллиард сўм бўлган 22 та лойиҳа юзасидан ваколатли ташкилотлар билан келишув жараёни бўлиб ўтди.
Изоҳ (0)