Сўнгги вақтларда ижтимоий тармоқлар ва мессенжерлардаги оммабоп саҳифаларда берилаётган турли кийим дўконларининг рекламаларида кийимлар, хусусан, пойабзалларнинг арзонлигига урғу бериш ҳолатлари кўпаймоқда. Харидор учун маҳсулот нархининг пастлиги айни муддао, аммо маҳсулотнинг сифати ҳам унинг нархига монанд равишда паст бўлиши, истеъмолчи саломатлигига зарар етказиши мумкин.
«Ўзстандарт» агентлиги вакили Отабек Умаровнинг «Дарё» мухбирига маълум қилишича, кийим дўконлари томонидан паст нархда таклиф қилинаётган кийим ва пойабзаллар сифатли бўлиши мумкин, агентлик бу маҳсулотларнинг сифатини фақат харидорлар мурожаати асосидагина текшириши мумкин.
«Бунга турлича ёндашиш мумкин. Масалан, арзон пойабзаллар маркетинг стратегияси асосида сотилаётган бўлиши мумкин. Бунда арзон кўрсатилган кийимнинг фойдаси бошқа кийимнинг нархига қўйилади. Бундан ташқари, арзон хом ашёдан ва тежамкор ишлаб чиқариш техникаларидан фойдаланиб, таннархни тушириши амалиёти ҳам мавжуд», — дейди «Ўзстандарт» агентлиги ходими Отабек Умаров.
Унинг қўшимча қилишича, Вазирлар Маҳкамасининг 2019 йил 24 апрелдаги «Ўзбекистон стандартлаштириш, метрология ва сертификатлаштириш агентлигининг фаолиятини янада такомиллаштириш тўғрисида»ги қарорида инсон ҳаёти хавфсизлигини таъминлаш бўйича мониторинг тартиби ишлаб чиқилган. Ушбу тартиб бўйича, давлат назорати, инспексион назорат, махсус сертификатлаштиришда инспексион назорат ҳамда истеъмолчилар ва харидорлардан келиб тушган шикоятлар асосида назорат хариди олиб борлиши мумкин.
Шунингдек, Вазирлар Маҳкамаси томонидан сертификатлаштириш шарт бўлган маҳсулолар рўйхати ҳам тасдиқланган. Унга мувофиқ, фақат болалар кийимлари мажбурий сертификатлаштириш жараёнидан ўтказилади. «Соддароқ қилиб айтганда, арзон маҳсулот сотаётган тадбиркорлик субъектларини тўғридан-тўғри текшириш ваколатимиз йўқ. Бунда фақатгина истеъмолчидан тушган шикоят асосида маҳсулотни лаборатория текширувларидан ўтказиб, сифатига баҳо бериш мумкин», — деди «Ўзстандарт» вакили.
«Ўзчармсаноат» уюшмаси ходими Шуҳрат Алиевнинг таъкидлашича, белгиланган нормаларга кўра ҳар қандай чарм пойабзалга, нархидан қатъий назар, ишлаб чиқарувчи томонидан олти ойгача кафолат берилиши лозим. Бу муддат ичида маҳсулот сифати бузиладиган бўлса, истеъмолчи маҳсулотни сотувчига олиб бориши ва келишув асосида қайта таъмирлатиш ёки пулни қайтариб олишга ҳақли.
«Шуни ёдда тутиш лозимки, олти ойлик муддатда оёқ кийим табиий шароитда сақланган ёки фойдаланилган бўлиши шарт. Яъни, нотабий ҳолатларда фойдаланиш оқибатида етган зарарларни қоплаш бундан мустасно», — деди Алиев.
Изоҳ (0)