БМТ Тараққиёт дастури маъмури ёрдамчиси, БМТТДнинг Европа ва МДҲ мамлакатлари бўйича минтақавий директори Мирьяна Сполярич Эггер 13—14 май кунлари Ўзбекистонда бўлади. Бу ҳақда «Дарё»га БМТТДнинг Ўзбекистондаги офиси маълум қилди.
Ўзбекистонга илк маротаба амалга оширадиган ташрифи давомида Мирьяна Эггер вазирликлар ва идоралар вакиллари билан БМТТД ва Ўзбекистон ўртасида коррупцияга қарши кураш, давлат бошқарувини такомиллаштириш, бандлик, аёлларнинг ҳуқуқ ва имкониятларини кенгайтириш, суд ислоҳотлари ва атроф муҳитни муҳофаза қилиш каби соҳалардаги ривожланиш ва ҳамкорлик масалаларини муҳокама қилиш учун учрашади.
БМТТДнинг Бандлик ва меҳнат муносабатлари вазирлиги билан амалга ошириладиган «Ўзбекистонда ёшлар бандлигига кўмаклашиш» янги лойиҳасини ишга туширилиши маросимида ҳамда коррупцияга қарши кураш бўйича минтақавий форумда қатнашади.
Маълумот учун, БМТТД Ўзбекистондаги фаолиятини 1993 йилдан бери олиб бормоқда ва ҳукумат билан миллий ривожланишга тўсиқлик қилаётган муаммоларни ҳал қилиш йўлларини топишда ҳамкорлик қилмоқда. БМТТД Ўзбекистонда уч йўналиш — барқарор иқтисодий ривожланиш, давлат бошқаруви, иқлим ўзгаришига мослашув ва атроф-муҳит муҳофазаси бўйича ишламоқда.
Изоҳ (0)