Ўзбекистон Миллий гвардияси ва Хитой Халқ қуролланган милицияси ўртасидаги ўзаро «Ҳамкорлик—2019» режасига асосан Жиззах вилоятида аксилтеррор ўқув-амалий машғулотлари ўтказилди. Бу ҳақда Миллий гвардия матбуот хизмати хабар берди.
Хитой делегацияси 2 май куни ташриф буюрган бўлиб, ҳамкорликдаги ўқув-амалий машғулотларга 5 май куни Жиззах вилоятининг «Фориш» полигонида старт берилган.
Тадбир очилиши маросимида Ўзбекистон Миллий гвардияси қўмондони биринчи ўринбосари генерал-майор Ботир Турсунов ва Хитой Халқ қуролланган милицияси қўмондони ўринбосари генерал-лейтенант Син Тян иштирок этган.
Машғулотлар давомида Миллий гвардия фахрий қоровул батальони шахсий таркиби кўргазмали чиқиш қилган. Хитой Халқ қуролланган милицияси ҳарбий хизматчилари эса қўл жанги бўйича чиқиш қилиб, мотоциклларни бошқариш усулларини намойиш этган.
Тахминан икки ҳафта давом этиши кутилаётган ҳамкорликдаги ҳарбий-ўқув машғулотлар уч босқичда ўтказилади:- 1-босқич — якка тартибдаги тайёргарлик;
- 2-босқич — гуруҳ таркибидаги тайёргарлик;
- 3-босқич — взводлар тайёргарлиги.
«Мазкур машғулотларнинг асосий вазифаси — Хитой Халқ қуролланган милицияси ва Ўзбекистон Миллий Гвардияси ўртасида ҳамкорлик алоқаларини мустаҳкамлашдир», — дейди бошқарма бошлиғи полковник Шуҳрат Ғаниев.
Изоҳ (0)