Германия президенти Франк-Вальтер Штайнмайернинг Ўзбекистонга ташрифи кутилмоқда. Мамлакат атроф-муҳит, табиат муҳофазаси ва ядровий хавфсизлик вазирлиги ҳамкорлик бўлими бошлиғи Юрген Кейнхорстга кўра, бўлажак ташриф экологик хавфсизлик борасидаги муносабатларни ҳам янги босқичга олиб чиқади. Бу ҳақда Берлиндан Алишер Азимов хабар бермоқда.
«Бу соҳадаги ҳамкорликнинг ижобий мисоллари ҳам бор. Ўзбекистонда иштирокимизда қишлоқ хўжалигини қўллаб-қувватлаш, тоғли ҳудудларда тупроқни эрозиядан ҳимоя қилиш бўйича лойиҳалар амалга оширилди ёки айни пайтда бажарилмоқда. Шунингдек, Амударё қирғоқларида қум кўчишини олдини олиш, ҳайвонот олами популяциясини сақлаш, туристик зоналарни ривожлантириш лойиҳалари ҳам ишлаб чиқилган. Уларни муваффақиятли юзага чиқариш учун 3 миллиондан 5 миллион еврогача маблағ ажратилган», — дейди Юрген Кейнхорст.
Ушбу ташриф арафасида Марказий Осиё минтақавий экология маркази (МОМЕМ) томонидан Европа Иттифоқи кўмагида амалга оширилаётган UzWaterAware лойиҳаси доирасида Германияга стади-тур ташкилланди. Лойиҳанинг миллий ҳамкори — Сув хўжалиги вазирлиги. Гуруҳга ОАВ вакиллари, жумладан, «Дарё» журналисти ҳам кирган.
Изоҳ (0)