Ўзбекистон Савдо-саноат палатаси ўз фаолияти учун зарур 50—60 миллиард сўмни давлат бюджетидан олиши «муаммо эмас», аммо бу ҳолда палата ҳукумат босими остида қолиб кетиши мумкин. Бу ҳақда палата раиси ўринбосари Ўткир Бўтаев «Дарё» мухбирига берган интервьюсида айтиб ўтди.
«Ўзбекистон Республикаси Савдо-саноат палатаси тўғрисида»ги қонунга кўра, палата аъзолари палата уставида белгиланадиган тартибда ҳамда миқдорларда кириш ва аъзолик бадаллари тўлайди. Бунда палатага кириш ва аъзолик катта компаниялар учунгина мажбурий ҳисобланади. Кичик бизнес ва хусусий тадбиркорлик субъектлари учун эса ихтиёрий этиб белгиланган.
Бугунги кунда Савдо-саноат палатасида 15 мингдан ортиқ тадбиркор рўйхатга олинган. Тадбиркорлик субъектларидан фақатгина 2400 нафари мажбурий аъзо бўлган. Қайд этиш жоиз, аъзолик бадали миқдори 20 миллион сўмдан 10 миллион сўмгача пасайтирилган.
Ҳукуматдан мағлаб беринглар десак, улар «йўқ» демайди. Палатанинг бир йиллик эҳтиёжларига керак бўладиган 50 ёки 60 миллиард сўмни бюджетдан ажратиш ҳеч қандай муаммо эмас. Лекин биз унда ҳукумат босими остида қолиб кетишимиз мумкин. Биз буни ҳоҳламаймиз. Келажакда тадбиркорларимизни ҳақ-ҳуқуқларини ҳар томонлама ҳимоя қиладиган эркин ташкилот бўлишимиз керак. Буни Президентимиз ҳам истаяпти.Палата раиси ўринбосарининг қўшимча қилишича, кичик бизнесни ривожлантириш учун йирик тадбиркорлар ёрдам бериши зарур. «Дунё тажрибаси шундай. Қозоғистонда тадбиркорларнинг палатага мажбурий аъзо бўлиши қонун билан белгилаб қўйилган. Венгрия қонунчилигида аввал Савдо-саноат палатасига аъзо бўлиш мажбурий эди, ҳозирги кунда эса ихтиёрий. Чунки улар энди пулга муҳтож эмас, оёққа туриб олган. Хизмат кўрсатади, тадбиркорнинг нимаики муаммоси бўлса, ечишга имконияти бор», — деди Бўтаев.Тушган маблағлардан ходимларимизни ойлик билан таъминлаш, салоҳиятли ва сифатли хизмат кўрсата оладиган кадрларни ишга олиш кўзда тутилган. Бизнес-форумлар ташкил этиш, ҳужжатларни юритиш, бизнес-режаларни тузиш учун салоҳиятли ходимлар керак-ку.
Ҳудудларда тадбирокрликка кўмаклашиш марказларини ташкил қилдик. Лекин улар ҳали биз ўйлаган ва тадбиркоралар истаган хизматни кўрсата олмаяпти. Палатанинг битта ёки иккита ходими ишлаётган туманда минглаб тадбиркорлар бор. Лозим даражада хизматни кўрсатиш учун ўнлаб ходимлар керак
Ўткир Бўтаев, Ўзбекистон Савдо-саноат палатаси раиси ўринбосари, Олий Мажлис Қонунчилик палатаси депутати
Аввалроқ Олий Мажлис Қонунчилик палатаси депутати Расул Кушербоев Ўзбекистон Савдо-саноат палатаси фаолиятини танқид остига олиб, у «давлат бўлиб давлат эмас, ё нодавлат бўлиб нодавлат ташкилот эмас»лигини таъкидлаб ўтган эди.
Ҳуқуқшунос Хушнудбек Худойбердиев эса Савдо-саноат палатасига ўхшаш нодавлат нотижорат ташкилотлари фақат ва фақат ихтиёрийлик асосида тузилиши мумкинлиги, амалдаги қонунчилик бундай ташкилотларга иштирокчиларни мажбуран аъзо қилишга имкон бермаслигини эслатиб ўтганди.
Изоҳ (0)