«Дарё» таҳририятига Наманган вилояти Чортоқ туманида яшовчи Зулфияхон Деҳқонова мурожаат қилди. Зулфияхон опанинг 24 ёшли қизи Феруза Содиқова уч йилдирки оғир дард билан курашади. Шифокорлар бундан бир неча йил олдин унинг икки ой умри қолганини айтган бўлса-да, қиз метин иродаси туфайли касалликка таслим бўлмади.
Онасининг айтишича, ўшанда Феруза унаштирилган, бир неч ойдан кейин тўйи бўлиши керак эди. Бирдан умрида касал бўлмаган қизнинг саломатлигида муаммолар кузатила бошлади. У боши оғриғи ва кўнгил айнишидан шикоят қиларди.
«Қизим Содиқова Феруза 2016 йил сентябрь ойида бош мия ўзак ўсмаси ташхиси билан Тошкент нейрохирургия шифохонасига ётқизилди.
У ерда шифокорлар қайта кўригидан ўтказилганда бу касалликни жарроҳлик йўли билан даволаб бўлмаслиги ва ўсма 3-мия қоринчасида жойлашганлиги сабабли жарроҳлик амалиётидан воз кечилди. Шифокорлар ўша пайтда фақатгина 3 ойгина яшай олишини айтишди. Наманган онкология бўлимида химиятерапия қилиб туришни айтишди. Онкология шифокорлари эса бемор химиятерапияни кўтара олмаслиги сабабли бу амалиётдан воз кечишди. Шундан сўнг қизимни МRT натижаларини Ҳиндистонга жўнатдик. Улар операция қилиш учун 22 700 $ миқдорида пул кераклиги айтилди. Бизда бундай маблағ бўлмаганлиги учун операцияни кейинроққа қолдиришга мажбур бўлдик. Бу муддат ичида Ҳиндистондан шифокор Праван Кумарнинг ўзи Тошкентга келди ва қизимни текширди.
Доктор Кумар қизимизни яхшилаб кўриб бошидаги ўсма анча ичкарида жойлашганлиги, операцияни ўтказиб бўлмаслигини айтди ва биз бу операциядан воз кечишга мажбур бўлдик. Шундан сўнг қизимизни халқ табобати билан даволаб келмоқдамиз. Бу муддат давомида ўсма катталашиб борди ва қизимизнинг кўзи кўрмай қолди», — дея ҳикоя қилади Зулфияхон опа.
Азизлар, ушбу оила ҳозирда жуда қийин молиявий аҳволда. Ферузани яна тиббий кўрикдан ўтказиш, зарур бўлса муолажаларни олиш учун эса пул керак. Муқаддас Рамазон ойида бир бемор юртдошимизга қўлдан келгунича ёрдам берайлик!
Хайрия қилиш учун маълумотлар:
Ферузанинг отасининг телефон рақами: 93 -405 68 28
Отаси Олимжон Деҳқонов номига очилган пластик карта рақами: 8600 0423 8353 6207
МФО: 00256
«Агробанк» Чортоқ филиалида очилган ҳисоб рақам: 23120000900000256002
Изоҳ (0)