Қозоғистонда саратон ва бошқа касалликларни даволаш учун марихуана (наша)дан фойдаланадиган клиника пайдо бўлиши мумкин, деб хабар берди Tengrinews.
Нашанинг махсус нави етиштирилиб, ундан дори воситасининг асоси бўлган ёғ ажратиб олинади. Ҳозир бундай фаолият билан АҚШ, Канада, Исроил ва бошқа бир қатор давлатлар шуғулланмоқда. Мутахассисларнинг ишонч билан таъкидлашича, саратонга қарши ушбу дори воситаси ёрдамида беш мингдан ортиқ одам даволанган.
Хорижий инвесторлар бундай тажрибани Қозоғистонда ҳам жорий этиш истагида. Ташкилот раҳбари Замиг Раҳимовнинг ўзи ҳам саратондан даволанган. Олмаотада кимётерапия курсини олган, лекин анъанавий даволаш усули тугашини кутмай, Исроилга жўнаб кетган. У ерда нашадан тайёрланган дори воситасини қабул қилган. Тадбиркорнинг таъкидлашича, икки ойдан сўнг касаллик чекинган.
Марихуанананинг «Индика» номли доривор навини Олмаота вилоятидаги Қапчағай шаҳри яқинида етиштириш режалаштирилмоқда. Иссиқхона қурилиши ва клиника очилишига инвесторлар 15 миллион доллар сармоя киритишга тайёр. Бир шиша доривор ёғнинг нархи 100 доллар бўлиши тахмин қилинмоқда.
Инвесторлар яқин кунларда Қозоғистон Соғлиқни сақлаш ва Ички ишлар вазирликлари билан музокаралар олиб боришни режалаштирган. Агар Қозоғистон ҳукумати бунга розилик берса, улар иссиқхона ва клиника қуришни шу йилнинг ўзидаёқ бошлашга тайёр.
«Нега айнан Қозоғистонни танладик? Чунки бу ерда наша етиштириш учун қулай иқлим шароити мавжуд. Келажакда бошқа касалликларни даволашда ҳам нашадан фойдаланиш бўйича тадқиқотлар олиб бориш мақсадида Қозоғистонга тажрибали профессорлар ва шифокорларни жалб этамиз. Умид қиламизки, Қозоғистон ҳукумати қонун доирасида бу дори воситаси билан расмий иш олиб боришга рухсат беради», — дейди Rais Medicann International компанияси асосчиси Эдди Исай.
Бу Қозоғистонда марихуана етиштириш ва уни қайта ишлашни қонунийлаштириш бўйича биринчи уриниш эмас. Икки йил аввал мамлакат Ички ишлар вазирлиги БМТ конвенциясига асосланиб, Олмаотадаги лабораторияда бундай тадқиқотларни олиб боришни тақиқлаган эди. Қозоғистонда расман фақат каннабиноиди бўлмаган техник наша етиштирилади. Ундан уруғлар, толалар ва ўзаклар учун хом ашё ишлаб чиқарилади. Қозоғистонда гиёҳванд ўсимликлар тақиқланган.
Паллиатив ёрдам ассоциацияси президенти Гулнора Кунированинг фикрича, саратон касаллигини даволаш бўйича янгича ёндашувларни жорий этишдан аввал мамлакатда рухсат берилган дори воситаларидан фойдаланиш имкониятини ошириш лозим. Уларнинг таркибида ҳам наркотик модда бўлгани сабабли шифокорлар беморга ҳар доим ҳам бундай дориларни буюрмайди.
Изоҳ (0)