Венесуэла президенти Николас Мадуро мухолифат кучлари устидан ғалабага эришганини маълум қилди. Бу ҳақда президент ўзининг Twitter’даги аккаунтида ёзиб қолдирди.
Боливариан Республикаси раҳбари «Венесуэлани зўравонликка тўлдирмоқчи бўлган кичик гуруҳни яксон этиш» жараёнини бошқарган мамлакатнинг ҳарбий раҳбариятини табриклади. Шунингдек, у 30 апрель куни мухолифат етакчиси Хуан Гуайдо томонидан давлат тўнтаришини амалга ошириш ҳаракатлари бўйича тергов ўтказишга буйруқ берди.
«Бу жазосиз қолмайди. Бош прокурор билан гаплашдим ва у ушбу ҳодисага алоқадор барчани тергов қилиш учун уч нафар прокурор ажратилганини айтди. Уларнинг вазифаси тергов ўтказиш ва жиноят ишини очишдан иборат», — дея таъкидлайди Мадуро.
Мадуронинг сўзларига қараганда, тўнтаришга уриниш вақтида беш нафар ҳарбий хизматчи яраланган, ҳозирда улардан икки нафарининг аҳволи оғир.
Эслатиб ўтамиз, 30 апрель куни Венесуэла мухолифати етакчиси Хуан Гуайдо видеомурожаат йўллаб, ҳарбийларни бош кўтаришга ва президент Николас Мадурони ағдаришга чақирган эди.
Изоҳ (0)