Миллиардер Ричард Бренсон ўзининг янги маркази очилишида ҳалок бўлишига бир бахя қолди (видео)

Virgin Group асосчиси ва миллиардер Ричард Бренсон ўзининг компаниясига тегишли Virgin Miami Central марказини очилиш вақтида бир ўлимдан қолди. Бренсоннинг айтишича, бу ўз ҳаёти қил устида қолган 77-ҳодиса экан, деб хабар беради Forum Daily.

Марказнинг тантанали очилиш маросимида реклама баннери ўрнатилган пўлат тўсин қулаб тушган. У Бренсоннинг бошидан бир неча сантиметр наридан учиб кетган.

Нохуш ҳодиса оқибатида ҳеч кимга зарар етмаган. Баннернинг қулаши туширилган видеони тадбиркор ўзининг Twitter’даги саҳифасига жойлаштирди.

https://twitter.com/richardbranson/status/1120605459172528129

Компаниянинг сайтида маълум қилинишича, ушбу ҳодиса миллиардер ҳаёти қил устида қолган 77-ҳодиса ҳисобланади. Бундан олдинги ҳолат 2017 йилда АҚШ қирғоқларига ёпирилган «Ирма» тўфони вақтида содир бўлган.

Бизнесмен, филантроп ва дунёнинг энг бой инсонларидан бири бўлмиш Ричард Бренсон ўз ичига 400 га яқин турли йўналишларни қамраб олган Virgin Group корпорациясига асос солган. Унинг Virgin Galactic  компанияси коинотга оддий инсонларни туристик мақсадларни олиб чиқишни режалаштираётган Жефф Безоснинг Blue Origin компанияси билан баҳслашади.