Қарши шаҳридаги мавжуд 7 та бозорда жиноятчиликнинг олдини олиш ва жамоатчилик назоратини кучайтириш мақсадида шаҳар ИИБнинг кўчма таянч пункти ташкил этилди. Бу ҳақда «Дарё»га Қарши шаҳар ИИБ маълум қилмоқда.
Шаҳар ИИБ берган маълумотга кўра, бозор ҳудудларига яқин масофада жойлашган 7 та кўчма таянч пунктда ўрнатилган кузатув камералари орқали теварак-атрофни доимий кузатиб бориш имконияти яратилган. Шунингдек, таянч пунктида ходимларнинг узлуксиз хизмат олиб бориши ва аҳоли билан яқин муносабатда бўлиши учун шароитлар ҳозирланган.
— 2019 йилнинг ўтган даври мобайнида Қарши шаҳар «Марказий буюм бозори» ва «Озиқ-овқат деҳқон бозори» ҳудудида 4 та ҳуқуқбузарлик ҳолати содир этилган бўлиб, шундан 2 таси аёлларнинг ўғрилик жинояти бўлган, — дейди профилактика катта инспектори, майор Турғун Йўлдошев. — Ҳолат профилактика инспекторлари томонидан бозор ҳудудини кузатувчи камералар орқали назоратга олиниб, ҳуқуқбузарлик содир этганлар воқеа жойида қўлга олинган. Бундан кейин айни шу каби ҳолатларнинг олдини олиш мақсадида Қарши шаҳар ҳокимлиги ва ИИБ раҳбарияти ташаббуси билан шаҳардаги мавжуд бозорлар ҳудудида ИИБнинг таянч пунктлари фаолияти ҳам йўлга қўйилди.
Маълум бўлишича, шаҳар ҳокимлиги ташаббуси билан Қарши–Шаҳрисабз йўналишидаги автомобиллар чорраҳасида ҳам ИИБ таянч пункти иш бошлаган бўлиб, ушбу масканда вилоятнинг чекка туманларидан вақтинча иш излаб келган фуқаролар учун ҳам шарт-шароит ҳозирланган.
— Қарши шаҳар меҳнат биржаси ходимлари ҳам ушбу таянч пункида вилоятимизнинг чекка ҳудудларидан келган вақтинча иш изловчиларни рўйхатга олиб, бўш иш ўринлари билан таъминлашни мақсад қилган, — дейди Қарши шаҳар меҳнат биржаси мутахассиси Ваҳоб Қўлдошев.
Мазкур ишлар давоми сифатида Қарши шаҳридаги энг серқатнов «Марказий буюм бозори» ҳудудидаги катта чорраҳада ҳам дақиқали светофорлар ўрнатилиб, автомобиллар ҳаракатини тартибга олиш анча осонлашган.
— Эски шаҳар чорраҳаси энг серқатнов чорраҳа бўлиб, автомобиллар ҳаракати ҳар доим тирбандликни юзага келтирган, — дейди Йўл ҳаракати хавфсизлиги Қарши шаҳар бўлими бошлиғи Аҳрор Усмонов. — Шу боисдан ҳам мазкур чорраҳада светофор чироқларининг алмашинувини кўрсатувчи дақиқали светофор ўрнатилиб, жамоатчилик хавотирига чек қўйилди.
Эслатиб ўтамиз, бундан аввалроқ Хива шаҳрида ИИБ таянч пунктлари фаолияти йўлга қўйилганлиги хабар қилинганди.
Изоҳ (0)