Термиз шаҳрининг «Аму соҳили» массивида аҳолининг асосан кам таъминланган қатлами, ижтимоий ҳимояга муҳтож оилалар учун имтиёзли кредитлар асосида бериладиган кўп қаватли уй-жойлар қурилган. Бироқ «Қишлоқ қурилиш инжиниринг» компанияси назоратида қурилиб, фойдаланишга топширилганига ҳали ҳеч қанча бўлмаган уйлардаги муаммолар хонадон эгаларини қийнамоқда. «Сурхондарё» телеканали орқали эфирга узатилган лавҳада шу ҳақда сўз боради.
Массивдаги 16-уйда истиқомат қилувчи фуқаролардан бирининг таъкидлашича, энг биринчи муаммо — эшиклар. «Ё заводдан носоз стандарт билан чиқарилган, ёки усталан нотўғри ўрнатган. Ёпилмайди», — дейди. Қўшни уйда яшовчи аёлнинг айтишича, эшиклар — «қуруқ ДСПнинг устига гулқоғоз ёпиштирилган» бир нарса, очилса ёпилмайди, ёпилса очилмайди. «25 декабрда хонадонни қабул қилиб, кирдик. Лекин ўшандан бери уйимизда газ йўқ. Чироқ ҳар куни ўчади», — дейди учинчи бир хонадон эгаси.
Кўп қаватли уйлар атрофида ободончилик ишлари тугул ҳали оқова-коммуникация тизимлари ҳам тўлиқ тугалланмаган. Яшаётган аҳоли эса, табиийки, ҳожатхона ва ювиниш ванналаридан фойдаланади. Натижада канализация қудуқлари ҳожатхона ва ювиниш хоналаридан чиққан оқова сувларига тўлиб, атрофга бадбўй ҳид тарқатмоқда. Телеканалдаги лавҳа давомида уйлардан бирининг иссиқ сув қувуридан илиқ сув чиқаётгани, унинг ҳам аксарият қисми қувурларнинг яхши ўрнатилмагани сабаб беҳуда оқиб, исроф бўлаётганини кўриш мумкин.
Ўзини «Қишлоқ қурилиш инвест» техник назоратчиси деб таништирган Раҳмонқул Каримов телеканал журналистларининг саволларига тузукроқ жавоб бера олмаган; ҳали фойдаланишга тайёр бўлмаган хонадонларга нега одамлар киритилгани ҳақидаги саволга эса: «Қаерда камчилик чиқаётган бўлса, изма-из тугатиб бориляпти», — деб жавоб берган. Бу саволга ушбу кўп қаватли уйларни қуришда қатнашган «Ангор Аргалит» компанияси раҳбари Нормўмин Эсанов аниқроқ жавоб берган — фуқаролар ҳали қурилиши якунланмаган уйларга ҳокимлик томонидан киритилган.
«Сурхондарё» телеканалининг Нормўмин Эсановга асосланиб қўшимча қилишича, қурилиш корхонаси ҳам, вилоят «Қишлоқ қурилиш инвест» компанияси ҳам хонадонларга ўрнатилган эшиклар, дераза ромлари ва иситиш тизими ускуналарини танлаш ваколатига эга эмас — уларнинг бари республика «Қишлоқ қурилиш инвест» раҳбари Ҳошимбековнинг кўрсатмаларига асосан, марказлашган ҳолда Тошкентдан — битта жойдан олинади. Бу ускуналарни ўрнатиш ишлари ҳам Тошкентдан келган усталар томонидан амалга оширилади ва бунинг учун алоҳида ҳақ олинади.
«Хулоса шуки, қурилиш тизимида эркинлик ва шаффофлик йўқ. Шу боис арзонлаштирилган уйлар ‘шу аммамга шу поччам бўлаверади’ қабилида қурилмоқда. Демак, бу ҳам бир каттаконнинг давлат тизимида йўлга қўйган бизнеси десак асло муболаға бўлмайди. Сурхондарёлик қурувчиларнинг, улар қурган уйларда яшовчи аҳолининг дарду ҳасратини ким эшитади? Яхшиси, бу масалага жавоб топишни республика ва вилоят прокуратураси ходимлари эътиборига ҳавола этамиз», — дея хулоса қилинган «Сурхондарё» телеканали лавҳасида.
Изоҳ (0)