Яқин вақт ичида Cotton Campaign’нинг Ўзбекистон пахтасига нисбатан бойкоти бекор қилиниши мумкин, айни вақтда бойкот, масалан, Европадаги ишлаб чиқарувчилар билан ҳамкорлик қилишга халал бермаяпти. Бу ҳақда «Ўзтўқимачиликсаноат» уюшмси раиси Илҳом Ҳайдаров «Дарё» мухбирига маълум қилди.
Маҳсулотларимизни экспорт қилиш жараёнида айрим чет эл корхоналари бойкот масаласини ҳал қилишни, кейин маҳсулотни сотиб олишини айтади. Бу норасмий тўсиқ ва бу Ўзбекистон тўқимачилик саноати маҳсулотларини ҳеч ким харид қилмайди, дегани эмас. Масалан, Европа бозорларидаги савдони кенгайтириб боряпмиз. Италия, Бельгия ва Германия ишлаб чиқарувчилари билан ҳамкорлик қиляпмиз.Ўзбекистон ҳукумати делегациясининг тарихда илк бор Cotton Campaign’нинг 2019 йил феврали бўлиб ўтган йиғилишида қатнашгани халқаро ҳамжамият томонидан мамлакат раҳбариятининг инсон ҳуқуқларини таъминлаш бўйича ҳамкорликка тайёрлиги сифатида олқишланган. «Ўзтўқимачиликсаноат» уюшмаси раҳбарининг фикрича, Cotton Campaign томонидан Ўзбекистон пахтасига нисбатан қўйилган тўсиқлар яқин ойларда олиб ташланиши мумкин.Илҳом Ҳайдаров, «Ўзтўқимачиликсаноат» уюшмаси раиси
Маълумот учун, узоқ йиллар давомида пахта терими мавсумида болалар ва мажбурий меҳнатдан фойдаланилгани боис, Ўзбекистон пахтаси халқаро жамоатчилик томонидан «қора рўйхатлар»га киритилган, етакчи ишлаб чиқарувчилар Ўзбекистон пахтасини бойкот қилган эди. Аммо сўнгги йилларда вазият ўзгармоқда — Халқаро меҳнат ташкилоти ҳисоботларига кўра, Ўзбекистонда пахта йиғим-теримига болаларни тизимли жалб этиш тўхтатилган, бундан ташқари, 2018 йилги мавсумда теримчиларнинг 90 фоизи ўз хоҳишига кўра далаларга чиққан.
Шу муносабат билан АҚШ маъмурияти Ўзбекистон пахтасини «қора рўйхатлар»дан чиқарди, АҚШ давлат идораларига Ўзбекистон пахтасини сотиб олишга рухсат берилди. Шунга қарамай, Ўзбекистон пахтаси Cotton Campaign’нинг бошқа «қора рўйхати»да қолмоқда. Ушбу халқаро коалицияга кирувчи тузилмалар Ўзбекистонга нисбатан бойкотни бекор қилиш ҳали эрта эканлигини билдирган, бунга сабаб сифатида мамлакатда мажбурий меҳнат ҳолатлари ҳали ҳам борлигини келтирган.
Қайд этиш жоиз, Ўзбекистон пахтасини бойкот қилиш ва сотиш занжирларидан чиқариб ташлашга розилик берган аниқ брендларнинг рўйхати мавжуд (улар орасида Adidas, Amazon, Burberry, Disney, Forever 21, Gap, Gucci, Ikea, Lacoste, Nike, Puma, Uniqlo, Zara кабилар бор). Ушбу рўйхат мунтазам кенгаймоқда — 2019 йил январида 310 та компания бўлган, апрель ойига келиб уларнинг сони 313 тага етган.
Изоҳ (0)