Давлат мактабларининг ўқувчиларига форма ишлаб чиқарувчи корхоналар ўзи жойлашган ҳудуддаги ўқувчиларга хизмат кўрсатади. Бу ҳақда «Ўзтўқимачиликсаноат» уюшмаси маълум қилди.
«Уюшмага аъзо бўлишидан қатъий назар, мактаб формасини тикишга имконияти етарли бўлган корхоналарга методик ёрдам берамиз. Шунингдек, корхоналарда мато етишмовчилиги бўлса, камчиликларни бартараф этишга кўмаклашамиз. Мактаб формасини тикиш бўйича Қорақалпоғистон Республикаси, Хоразм, Наманган, Фарғона ва Андижон вилоятининг барча туман, шаҳарларида ишлар бошлаб юборилган. Ўйлайманки, 1 сентябргача барча мактаб ўқувчилари форма билан тўлиқ таъминланади», — деди уюшма раиси Илҳом Ҳайдаров.
Унинг қўшимча қилишича, мактаб формаси учун айрим жойларда импорт матолардан ишлатилиши мумкин. Фойдаланилаётган барча материаллар стандартларга тўла-тўкис жавоб беради.
Давлат мактабларининг ўқувчиларини ягона мактаб формаси билан таъминлашга оид ҳукумат қарори 2018 йил 15 августда қабул қилинган. Унга кўра, «Ўзтўқимачиликсаноат» уюшмаси мактаб формасини ишлаб чиқарувчи ташкилотлар рўйхатини ҳудудлар бўйича шакллантириши ҳамда аҳолига қулай жойларида мактаб формаси савдо шохобчаларини ташкил этиши белгиланган.
Аввалроқ Халқ таълими вазирлиги бошқарма бошлиғи Акбар Тоғаев умумий ўрта таълим муассасалари ўқувчиларининг ягона мактаб формаси 2019/2020-ўқув йилидан мажбурий бўлишини айтиб ўтганди.
Изоҳ (0)