29 апрелнинг эътиборга молик янгиликлари — «Дарё» дайжестида.
Тошкентда 9-синф ўқувчиси мактабнинг иккинчи қавати деразасидан ўзини ташлади.
Қайд этилишича, ўқувчи қиз онасининг синф раҳбари билан гаплашишга келганини билиб, шу тарзда мактабдан қочиб кетмоқчи бўлган.
***
Ўртачирчиқда Бухородан зиёратдан қайтаётган автобус бетон тўсиққа бориб урилди.
Ушбу автобусда Тошкент вилояти Паркент тумани 31-умумий ўрта таълим мактабининг 37 нафар ўқувчиси, 3 нафар ўқитувчиси, 10 нафар ота-она ҳамда 3 нафар ҳайдовчи бўлган.
Кейинроқ Соғлиқни сақлаш вазирлиги маълум қилишича, Тошкент вилоятининг Ўртачирчиқ туманида бетон тўсиққа урилган автобус ичидаги 53 нафар йўловчидан 27 нафари турли даражада тан жароҳати олган.
***
Энди Ўзбекистонда ўқишга киришда «086-У-форма» талаб қилинмайди.
Ҳукуматнинг Олий таълим муассасаларига ўқишга қабул қилиш, талабалар ўқишини кўчириш, қайта тиклаш ва ўқишдан четлаштириш тартиби тўғрисидаги низомларни тасдиқлаш тўғрисидаги қарорига ўзгартириш ва қўшимчалар киритилди.
Эндиликда олий таълим муассасаларига ҳужжат топширишда 086-У-шакл бўйича тиббий маълумотнома талаб қилинмайди.
***
«Ўзтўқимачиликсаноат»: 1 сентябргача барча мактаб ўқувчилари форма билан тўлиқ таъминланади.
Давлат мактабларининг ўқувчиларига форма ишлаб чиқарувчи корхоналар ўзи жойлашган ҳудуддаги ўқувчиларга хизмат кўрсатади.
Мактаб формаси учун айрим жойларда импорт матолардан ишлатилиши мумкин. Фойдаланилаётган барча материаллар стандартларга тўла-тўкис жавоб беради.
***
Ўзбекистонда электрон молиявий пирамида яратувчиси 5 йилга озодликдан маҳрум қилинди.
У виртуал ўйиннинг ҳар бир иштирокчисига 600 минг сўм ваъда қилган. Шунингдек, дўстларини ҳам шу гуруҳга жалб қилганларга бонуслар тақдим этган. Иштирокчилар ўйиннинг кейинги босқичига ўтиб, яна ҳам кўпроқ пул ишлаган. Унинг виртуал ўйинини 7 минг киши ўйнаган.
Изоҳ (0)