Президент Қаршида 1500 тадбиркор фаолиятини тўхтатганини танқид қилганди. Вилоят солиқ бошқармаси бошлиғи бунга изоҳ берди

Президент Шавкат Мирзиёев 2019 йилнинг биринчи чораги якунлари бўйича Давлат бюджетига тушумлар ва экспорт прогнозлари ижроси натижадорлиги ҳамда биринчи ярим йиллик учун белгиланган кўрсаткичларнинг сўзсиз бажарилишини таъминлаш юзасидан ўтказилган видеоселекторда Қарши шаҳрида 2019 йилдан бошлаб якка тартибдаги тадбиркорларга солиқ юки 30 фоизга камайтирилган бўлса-да, Қарши шаҳрида 1500 нафар тадбиркор ўз фаолиятини тугатганини танқид қилганди.

Қашқадарё вилоят Давлат солиқ бошқармаси бошлиғи Равшанжон Насимовнинг вилоят журналистлари билан «Аҳолининг солиқ тўлаш маданиятини юксалтиришда оммавий ахборот воситаларининг ўрни» мавзусида бўлиб ўтган мулоқоти жараёнида шу ҳақда тўхталиб ўтилди.

— 1500 нафар тадбиркорнинг фаолияти тўхтатилиш жараёнини ўрганганимизда аслида ҳисобда бўла туриб, фаолият юритмаётган номига очиб қўйилган тадбиркорлик фаолиятлари борлиги кўриниб қолди, — дейди Қашқадарё вилоят Давлат солиқ бошқармаси бошлиғи Равшанжон Насимов. — Яъни коллеж битирувчиси банкдан кредит сўраб борса, ЯТТ ташкил қилиб келиши ёки МЧЖ очса кредит берилиши мумкинлиги айтилган ва шу тақлид номига бўлса-да, тадбиркорлик субъекти ташкил этилган. Шунинг учун ҳам тадбиркорлик фаолиятини тугатган субъектлар сони Қарши шаҳрида кўп миқдорда эканлиги кўриниб қолган.

Матбуот анжуманида шунингдек, иш ҳақи бўйича ҳам солиқ тўловчиларга берилган енгилликлар, солиқ юкининг камайтирилиши ижобий натижасини бериб, 4410 та хусусий сектор субъектлари томонидан қўшимча равишда 16 503 нафар фуқаро фаолияти қонунийлаштирилгани ва натижада ўтган йилнинг мос даврига нисбатан даромад солиғи ҳисобига 103,3 миллиард сўм кўп маблағ тушишига эришилгани айтиб ўтилди.

Вилоятда жорий йилнинг айни кунига қадар 7 156 та солиқ солиш объектида ва солиқ солиш билан боғлиқ объектларни аниқлаштириш мақсадида кўздан кечириш ҳамда сўров ўтказиш натижасида 11 695 та камчилик аниқланган. Шундан 1 933 нафар фуқаро ҳужжатсиз фаолият юритган маълум бўлгач, 574 таси қонуний рўйхатдан ўтказилган.

1425 нафар ноқонуний ёлланма ишчилар мавжудлиги аниқланиб, 821 таси расмийлаштирилган.