Шерзод Қудратхўжаев бошчилигидаги Ўзбекистон журналистика ва оммавий коммуникациялар универститети делегацияси Жанубий Кореянинг Сеул шаҳрида жойлашган Кукмин университетига ташриф буюрди. Бу ҳақда университет матбуот хизмати «Дарё»га хабар берди.
Университетда 20000 нафар талаба таҳсил олмоқда. Уларнинг 1800 нафари хорижий мамлакатлар фуқаролари ҳисобланади.
Университетда 600 нафар профессор фаолият юритади. Кукмин университети алоқа факультети медиа ва коммуникация соҳасида мутахассисларни тайёрлаш билан шуғулланади. Ушбу университетда мультимедиа ва фото лабораториялар, визуал маҳсулотлар ишлаб чиқариш лабораторияси ташкил этилган.
Алоқа факультети раҳбари, профессор Доҳ Еон Ким Кукмин университети томонидан тайёрланган тақдимот билан чиқди.
Ўз навбатида, Ўзбекистон журналистика ва оммавий коммуникациялар университети делегацияси университетнинг академик йўналишлари, таълим жараёни ва халқаро алоқалари ҳақида сўзлаб берди.
Ушбу учрашувда ўзаро ҳамкорлик тўғрисидаги меморандум имзоланган бўлиб, унда стажировкаларни ташкил этиш, талабаларнинг академик алмашинуви, қўшма илмий тадқиқотлар ва конференциялар ташкил этиш, шунингдек, илмий ва амалий медиа лойиҳаларни амалга ошириш кўзда тутилган.
Учрашувда икки давлат журналистикаси ва оммавий ахборот воситалари олдида турган долзарб вазифалар, жумладан, фейкларнинг профессионал журналистикага таъсири, ижтимоий тармоқлар ва блогларда тақдим этилаётган ахборотга бўлган ишонч масалалари, аҳолининг медиа-таълимини ошириш зарурлиги масалалари муҳокама қилинди.
Изоҳ (0)