Бугун, 24 апрель куни Хоразм вилоятининг Урганч шаҳрида «Central Asia– 2019: Фан, таълим, маданият ва бизнесда интернет ва ахборот кутубхона ресурслари» XIII Халқаро конференцияси бошланди. Бу ҳақда Ахборот ва оммавий коммуникациялар агентлиги хабар берди.
Унда 10 дан ортиқ мамлакатдан ташриф буюрган халқаро экспертлар, ахборот-кутубхона ва ахборот-ресурс марказлари, кутубхоналар, нашриётлар, архивлар, музейлар раҳбарлари ва мутахассислари, олимлар, таълим муассасалари ўқитувчилари, АКТ мутахассислари, жамоат арбоблари, вазирлик ва идоралар вакиллари иштирок этмоқда.
Халқаро конференцияни Хоразм вилояти ҳокими Фарҳод Эрманов кириш сўзи билан очди ва конференция иштирокчиларини табриклади.
Конференцияда Ўзбекистон Республикаси Президенти Администрацияси ҳузуридаги Ахборот ва оммавий коммуникациялар агентлиги директорининг биринчи ўринбосари Аваз Ҳожиметов сўзга чиқди ҳамда халқаро экспертларга Ўзбекистонда соҳага қаратилаётган эътибор, шу жумладан, Ахборот ва оммавий коммуникациялар агентлиги томонидан китобхонликни оммалаштириш, китоб тарғиботи, кутубхоналар ва ахборот ресурс марказларини ривожлантириш юзасидан амалга оширилаётган ишлар, янги лойиҳалар ҳақида сўзлаб берди.
«Мазкур халқаро конференция ахборот-кутубхона ресурслари соҳасида янги босқични бошлаб беради. Бу ерда дунёнинг ривожланган мамлакатларидан экспертлар иштирок этаётгани маҳаллий мутахассисларга жуда асқотади.
Ўзбекистонда ахборот-кутубхона соҳасири ривожлантиришга оид Президент қарори қабул қилинган ва ушбу қарор ижроси юзасидан таълим муассасалари кутубхоналарини адабиётлар билан тўлдириш, ўзбек ва жаҳон адабиёти намуналарининг аудио вариантларини яратиш, «Библиобус»лар фаолиятини йўлга қўйиш, QR-кодлар ёрдамида электрон китоблардан фойдаланиш, кутубхоначилик соҳасида миллий ва халқаро тадбирларни ташкил этиш сингари муҳим ишлар амалга оширилди.
Давлатимиз раҳбари илгари сурган бешта ташаббус асосида эса китобхонликни янада оммалаштириш, кутубхоналар фондини бойитиш юзасидан мисли кўрилмаган лойиҳалар ҳаётга тадбиқ этилмоқда. Ишонаманки, ушбу халқаро конференция ҳам ўзаро фикр ва тажриба алмашиш майдони, кутубхона тизимини замонавий асосларда ривожлантириш, китобхонликни тарғиб қилиш ва ташкил этишга хизмат қилади»,— деди Аваз Ҳоджиметов.
Халқаро конференцияда, шунингдек, АҚШ Кутубхона фонди ижрочи директори Меррис Сумралл, Беларусь Миллий кутубхонаси директори Роман Мотулский ва бошқа халқаро экспертлар халқаро конференциянинг аҳамияти, унда муҳокама этилаётган мавзуларнинг долзарблиги ҳақида сўз юритди.
Анжуманнинг биринчи кунида «Библиотека 4.0» – келажак хизмат кўрсатиш кутубхонаси модели», «Контентлар тизимини бошқариш имкониятлари: Ахборот саводхонлигини ошириш ечимлари ва кутубхона дастурлари», «Илмий янгиликлар агрегатори таҳлилий тадқиқотлар учун ахборот ресурси ва база сифатида», «Рақамлаштирилган коллекциялар электрон тўпламларни ташкил қилиш шакли сифатида: Президент кутубхонаси тажрибаси», «Ўзбекистон Республикасида кутубхона ва ахборот соҳасининг ҳозирги ҳолати ва ривожланиш истиқболлари» каби мавзуларда маърузалар тингланмоқда.
Изоҳ (0)