Самарқанд туман «Хўжа Аҳрор Вали-2» маҳалласида яшовчи 1965 йилда туғилган Ўктам Исломов 2018 йилнинг август ойларида Л.М. исмли аёлга ўзини фуқароларни Япония давлатига жўнатиб иш билан таъминлаш фаолияти билан шуғулланувчи шахс деб таништирган.
Ўктам Исломов Л.М.нинг ишончига кириб, унинг икки нафар ўғли Р.Й. ва Н.Й.ни Япония давлатига мўмай ойлик маош тўланадиган жойга ишга жойлаштиришини маълум қилган. Ўктам Исломов аёлдан жами 4500 АҚШ доллари миқдоридаги пулларни фирибгарлик йўли билан қўлга киритиб, ўз эҳтиёжлари учун ишлатиб юборган.
Ўзининг жиноий ҳаракатларини давом эттирган Ўктам Исломов Х.З.ни ҳам алдаб, Японияга ишга юборишини айтиб, 1500 АҚШ доллари миқдоридаги пулларини фирибгарлик йўли билан қўлга киритган.
Икки кишини ўз ёлғонларига ишонтирган Ўктам Исломов ўзининг жиноий ҳаракатларини давом эттириб, фуқаро К.А.ни ҳам Япония давлатига жўнатишга ваъда бериб ундан ҳам 1500 АҚШ доллари миқдоридаги пулларини фирибгарлик йўли билан қўлга киритган.
Жиноят ишлари бўйича Самарқанд туман суди судьяси Даврон Нуралиевнинг «Дарё»га маълум қилишича ўзгаларни фирибгарлик йўли билан чув тушириб келган Ўктам Исломовнинг жиноий ҳаракатлари атрофлича ўрганилиб, суд ҳукми ўқилган. Суд ҳукмига кўра, Ўктам Исмоилов Ўзбекистон Республикаси Жиноят Кодексининг 168-моддаси 3-қисми «б» бандида (такроран ёки хавфли рецидивист томонидан содир этилган фирибгарлик) келтирилган жиноятларни содир этилганликда айбдор деб топилиб 5 йил муддатга озодликдан маҳрум қилиш жазоси тайинланди.
Изоҳ (0)