расмий ахборот эълон қилиб, инсон ҳуқуқлари бўйича фаоллар, хорижий дипломатлар билан учрашувда ҳокимлик вакиллари иштирок этмаганлиги сабабини маълум қилди.
«Оммавий ахборот воситаларида 15 апрель куни ҳокимлик масъуллари билан мулоқот қилмоқчи бўлган инсон ҳуқуқлари бўйича фаоллар, хорижий дипломатлар билан учрашувда ҳокимлик вакиллари иштирок этмаганлиги ҳақида ахборот тарқатилган.
Учрашувга 12 апрелда ёзилган таклиф хати ҳокимлик канселяриясига 15 апрель куни эрталаб ташлаб кетилган. Ҳокимият иш Регламентига кўра, кун давомида қабул қилиб олинган мурожаат ва таклифлар ҳамда бошқа хат-ҳужжатлар рўйхатга олиниб, тегишли масъуллар белгиланиб, ҳокимнинг котибиятига йўналтирилади. Йиғилган корреспонденсия кун охирида тегишли топшириқ ва жавобларни олиш учун ҳокимга тақдим этилади. Шуни инобатга олган ҳолда учрашув бўйича таклифни 3—4 кун олдин жўнатиш мақсадга мувофиқ бўлар эди. Йўлланган хатнинг услуби ҳам жиддий ёндашувга ундайдиган тарзда битилмаганини унинг қуйидаги нусхасидан ҳам билиб олса бўлади.
Шаҳар ҳокимининг иш режаси олдиндан белгиланишини ҳисобга олиб, ташкилотчилар учрашув кунини ҳокимият масъуллари билан олдиндан мувофиқлаштирганда, ҳозирги вазиятга ўхшаган тушунмовчилик рўй бермас эди.
Бундан ташқари, хат «Гуманитар ҳуқуқ маркази» директори томонидан имзолаган бўлиб, унда ташкилотнинг аниқ манзили, телефон рақами йўқлиги сабаб, унинг фаолияти қонуний ёки ноқонуний эканлигини аниқлашнинг имкони йўқ. Хатда ёзиб қолдирилган рақам орқали ҳам учрашув ва унинг ташкилотчиси ҳақида тўлиқ маълумот олишнинг иложи бўлмади. Учрашув ташаббусчиларига кейинги сафар пухтароқ тайёргарлик кўришни тавсия қилган бўлардик. Зероки, шаҳар ҳокимининг номаълум ташкилот уюштираётган номаълум учрашувга зудлик билан етиб боришининг эҳтимоли жуда паст.
Тошкент шаҳар ҳокимияти мулоқот учун очиқлигини маълум қилган ҳолда инсон ҳуқуқлари бўйича фаоллар, халқаро ташкилотлар ва дипломатик корпус вакиллари билан тегишли мавзуларда ҳамкорлик қилишга, биргаликда мавжуд муаммо ва камчиликларни бартараф этишга тайёрлигини билдиради. Айнан шу мавзуларни биргаликда ўрганиб чиқиш ва муҳокама қилиш учун, шаҳар ҳокими аввал ҳам айтганидек, учрашув ташкил этилиши режалаштирилган. Унинг аниқ тафсилоти ҳақида шаҳар ҳокимияти матбуот хизмати қўшимча хабар беради.
Дезинформация ва шошилинч хулосаларнинг олдини олиш мақсадида оммавий ахборот воситалари, блогер ва журналистларни улар қизиққан мавзуларда ўзаро алоқага чиқиб, мулоқот қилиб, вазиятнинг иккинчи томонини ҳам ўрганишга, жамоатчиликка аниқ маълумотлар тарқатишга, холис ёндашувга ва беғараз ҳамкорликка чақирамиз», — дейилади ҳокимлик хабарида.
Изоҳ (0)