10 апрель куни Будапешт шаҳрида «Давергеодезкадастр» қўмитаси раиси ўринбосари А.Маматов Венгрия давлат ғазначилиги раиси Жозеф Мезарош билан учрашди, деб хабар берди қўмита матбуот хизмати.
Учрашувда томонлар ўзаро ҳамкорлик масалалари йўналишларини муҳокама қилиб, ер муносабатлари соҳасида тажриба алмашган.
11 апрель куни қўмитаси делегацияси Венгрия Бош вазири маъмуриятига ташриф буюрган. Ташриф чоғида қўмита раиси ўринбосари А.Маматов ва Давлат котиби, Венгрия давлат бошқаруви вазири жаноб Бенче Туссоннинг икки томонлама расмий учрашуви бўлиб ўтган.
Унда Бенче Туссон Венгрияда давлат хизматларини кўрсатиш соҳасида олиб борилаётган ишлар хусусида батафсил баён этган. Шундан сўнг делегация аъзолари учун Венгрия парламенти биноси ичида экскурсия ўтказилган.
Делегация, шунингдек, Лехнер номли билим марказининг Бош директори жаноб Фекете Габор билан ҳам учрашган. Учрашув якунида Ўзбекистоннинг «Геоинновация маркази» Давлат унитар корхонаси ва Лехнер номли билим маркази ўртасида ер ресурслари, геодезия, картография ва давлат кадастри соҳасидаги инновацион лойиҳаларни амалга оширишда ҳамкорликни назарда тутувчи ўзаро англашув меморандуми имзоланган.
Ташрифнинг якуний куни 12 апрелда делегация аъзолари «Давергеодезкадастр» қўмитаси ходимларининг геодезия, картография, масофадан зондлаш ва геоинформатика бўйича малакасини ошириш мақсадида Секешфеҳервер шаҳрида жойлашган Obuda университетига ташриф буюрган.
У ерда томонлар «аниқ деҳқончилик» тизими соҳасида учувчисиз учиш воситаларидан фойдаланиш бўйича Ўзбекистондаги тажриба майдончасида изланишлар олиб бориш ҳақида келишиб олган.
Изоҳ (0)