10-aprel kuni Budapesht shahrida “Davyergeodezkadastr” qo‘mitasi raisi o‘rinbosari A.Mamatov Vengriya davlat g‘aznachiligi raisi Jozef Mezarosh bilan uchrashdi, deb xabar berdi qo‘mita matbuot xizmati.
Uchrashuvda tomonlar o‘zaro hamkorlik masalalari yo‘nalishlarini muhokama qilib, yer munosabatlari sohasida tajriba almashgan.
11-aprel kuni qo‘mitasi delegatsiyasi Vengriya Bosh vaziri ma’muriyatiga tashrif buyurgan. Tashrif chog‘ida qo‘mita raisi o‘rinbosari A.Mamatov va Davlat kotibi, Vengriya davlat boshqaruvi vaziri janob Benche Tussonning ikki tomonlama rasmiy uchrashuvi bo‘lib o‘tgan.
Unda Benche Tusson Vengriyada davlat xizmatlarini ko‘rsatish sohasida olib borilayotgan ishlar xususida batafsil bayon etgan. Shundan so‘ng delegatsiya a’zolari uchun Vengriya parlamenti binosi ichida ekskursiya o‘tkazilgan.
Delegatsiya, shuningdek, Lexner nomli bilim markazining Bosh direktori janob Fekete Gabor bilan ham uchrashgan. Uchrashuv yakunida O‘zbekistonning “Geoinnovatsiya markazi” Davlat unitar korxonasi va Lexner nomli bilim markazi o‘rtasida yer resurslari, geodeziya, kartografiya va davlat kadastri sohasidagi innovatsion loyihalarni amalga oshirishda hamkorlikni nazarda tutuvchi o‘zaro anglashuv memorandumi imzolangan.
Tashrifning yakuniy kuni 12-aprelda delegatsiya a’zolari “Davyergeodezkadastr” qo‘mitasi xodimlarining geodeziya, kartografiya, masofadan zondlash va geoinformatika bo‘yicha malakasini oshirish maqsadida Sekeshfeherver shahrida joylashgan Obuda universitetiga tashrif buyurgan.
U yerda tomonlar “aniq dehqonchilik” tizimi sohasida uchuvchisiz uchish vositalaridan foydalanish bo‘yicha O‘zbekistondagi tajriba maydonchasida izlanishlar olib borish haqida kelishib olgan.
Izoh (0)