Жорий йилнинг май ойида Тошкент шаҳрида атом энергияси бўйича ахборот маркази очилади. Бу ҳақда Россиянинг Сочи шаҳрида бўлиб ўтаётган XI «Атомекспо» форумида маълум қилинди, деб хабар берди «Дарё» мухбири Севара Нишонова.
«Росатом» давлат корпорацияси ҳузуридаги «Русатом — халқаро тармоқ» соҳавий тармоғи президенти Александр Мертеннинг маълум қилишича, бундай ахборот марказлари атом станцияси ва бошқа объектларга эга бўлган мамлакатлар ҳудудида ташкил этилади.
«Аҳолига атом технологиялари, ядровий тиббиёт ривожига ҳисса қўшувчи замонавий ёндошувлар ҳамда ядровий технологиялардан қишлоқ хўжалиги ривожида фойдаланиш ҳақида маълумот бериш мақсадида биз турли мамлакатларда ахборот марказлари очишга ҳаракат қиламиз. Ана шундай марказлардан бири май ойида Тошкентда очилишини маълум қилишдан хурсандман.
Ўзбекистон аҳолисига ядровий технологиялар ҳақида тўғри маълумот бериш, атом энергетикаси атмосферага CО2 ажралиб чиқиши камайиши ҳисобига сайёрани сақлаб қолишга кўмаклашишини тушунтириш жуда муҳим», — дейди Александр Мертен журналистлар билан суҳбатда.
Атом энергияси бўйича ахборот марказларига ушбу соҳага қизиқиш билдирган исталган ёшдаги инсонлар ташриф буюриши ва маълумот олиши мумкин бўлади.
Маълумот учун, «Росатом» бутун дунё бўйлаб аҳолига атом энергетикаси ҳақида маълумот бериш мақсадида ахборот марказларини ташкил қилиб келмоқда. Бундай марказлар сони ҳозирги кунда 21 тани ташкил этади. Улардан 16 таси Россияда, 5 таси эса дунёнинг бошқа мамлакатларида (Бангладеш, Вьетнам, Туркия, Беларусь, Қозоғистон) жойлашган. Ўзбекистонда иш бошлаши кутилаётган ахборот маркази эса тартиб бўйича 22-марказ бўлади.
Мертеннинг сўзларига кўра, «ядровий энергетикадан қўрқишга ҳожат йўқ, сабаби у исталган турдаги бошқа генерациядан кўра кўпроқ фойда келтиради».
«Бутун дунёда атом энергетикасини яшил энергетика деб тушунишади», — дея қўшимча қилади у.
Изоҳ (0)