Месси Ла Лигада жарима зарбасидан гол уриш борасида етакчи, Гризманн эса уни таъқиб қилишда давом этмоқда

13 апрель, шанба куни футбол бўйича Испания чемпионатининг 32-турида «Атлетико» ўз майдонида «Сельта»ни мағлуб этди (2:0).

Мадридликлар ҳужумчиси Антуан Гризманн учрашувнинг 42-дақиқасида стандарт вазиятдан гол уришга муваффақ бўлди. Бу унинг жорий мавсум Ла Лигадаги стандарт вазиятдан урилган 3-голи (11 та уринишдан) бўлди. Аввалроқ франциялик «Севилья» ҳамда «Леганес» дарвозаларини ҳам жарима зарбасидан ишғол қилганди.

Бу кўрсаткичда «Барселона» ҳужумчиси Лионель Месси етакчи ҳисобланади. Унинг ҳисобида 38 та уринишдан 6 та стандарт вазиятдан урилган гол мавжуд.

Эслатиб ўтамиз, Антуан Гризманн жорий мавсум Испания чемпионатида 32 та ўйинда майдонга тушиб, 14 та гол урди ва 10 та голга ассистентлик қилди.