ЎзА Фарғона вилоятининг Олтиариқ туманидаги ҳолат ҳақида мақола чоп этилди. Қуйида мақола тўлиғича ҳавола этилди.
Фарғона вилоятининг Олтиариқ туманида обод масканлар жуда кўп. Аммо шундай маҳаллалар ҳам борки, у ердаги нохуш манзаралардан дилингиз хира бўлади. Баъзи маҳалла фуқаролар йиғинининг биноси таъмирталаб ва аянчли аҳволда. Тизим ходимлари учун етарли шароитлар яратилмаган бўлиб, ободонлаштириш ишлари ўз ҳолига ташлаб қўйилган.
Маҳалла-жамиятнинг кичик бир бўлаги сифатида бугун кўплаб ваколатларга эга. Айни дамда фуқароларнинг ўзини ўзи бошқариш органлари фаолияти самарадорлигини ошириш масаласига ҳам муҳим эътибор қаратиб келинмоқда. Президентимизнинг 2017 йил 3 февралдаги «Маҳалла институтини янада такомиллаштириш чора-тадбирлари тўғрисида»ги фармони асосида жойларда салмоқли ишлар амалга оширилмоқда.
Олтиариқ туманида 72 та маҳалла фуқаролар йиғини бўлиб, улар томонидан ижтимоий-иқтисодий аҳамиятга молик вазифалар бажарилиб келинмоқда. Албатта, йилдан йилга маҳалла биноларини таъмирлаш, уларнинг моддий-техника базасини мустаҳкамлаш бўйича ҳам бир қатор ишлар олиб борилмоқда. Аммо ҳозирда тумандаги эттита маҳалла фуқаролар йиғинининг биноси таъмирталаб аҳволда.
«Қаҳрамон» маҳалла фуқаролар йиғинида бўлганимизда бу ердаги ҳолатдан таажжубга тушдик. Олтиариқликлар кафтдек ерни эъзозлаб, томорқачиликда катта мактаб яратган. Аммо мазкур маҳалла биноси ҳудудидаги ер майдони ташландиқ ҳолатда. Умуман, бу ерда ободонлаштириш ишлари талабга жавоб бермайди. Мутасаддилар ер майдонининг маълум қисми тадбиркорга берилганини, у томонидан қурилиш ишлари бошланаётганлигини айтиш баҳонаси билан ўзларини оқламоқчи бўлди.
Ахир ўз ўзини бошқариш органлари бугун ўз ҳудудида томорқадан самарали фойдаланиш, ободонлаштириш ишларига масъул ҳисобланса-ю, аввало ўзи бу ишда бошқаларга ибрат бўлмаса? Буни қандай тушуниш мумкин?
Айни кунларда мазкур йиғинда уч минг 600 дан зиёд аҳоли истиқомат қилмоқда. Маҳалланинг ички кўчаларига ёғин–сочин кунларида кирсангиз, лойга ботиб қолишингиз аниқ.
«Маҳалладаги муаммоларимиз аста-секин ҳал этилмоқда, — дейди «Қаҳрамон» маҳалла фуқаролар йиғини раиси Тўйчибой Раззоқов. — Ўтган йилда беш километрга яқин ичимлик суви тортилди. ‘Обод қишлоқ’ дастури асосида ҳам янги маҳалла йиғини учун бино ва гузар қуришни режалаштириб турибмиз».
Албатта, ният ва режаларнинг бўлгани яхши. Аммо у фақат қуруқ гап билан амалга ошмайди. Бу ҳудудга масъул бўлган сектор раҳбари ҳам маҳалла билан яқин бўлиб, уларнинг муаммосини ҳал этиш чораларини кўриши керак. Ҳудуддаги 19-умумтаълим мактабида ҳам ўтган йил октябрь ойида таъмирлаш ишлари бошланганда, барча жуда севинган эди. Аммо бу узоққа чўзилмади. Бир икки ой ўтгач, маблағ йўқлиги боис барча қурилиш ишлари чала ҳолатда, тўхтаб қолди. Маҳалла аҳли ҳам, ўқитувчилар ҳам бугун бу ишлардан ҳайрон. Кимга арз қилишини ҳам билмайди.
Туманда «Повулғон» маҳалла фуқаролар йиғини биносига кирган киши ҳам аянчли аҳволни гувоҳи бўлади. Барча хоналар таъмирталаб. Кичик зални ҳолатини гапирмаса ҳам бўлади. Тартиб, озодаликка умуман эътибор йўқ. Бинонинг орқа томонидаги экин майдони эса ўз ҳолига ташлаб қўйилган.
Маҳалла бундай шароитда халқнинг чинакам маслакдоши ва кўмакдошига айлана олармикан? Биз мутасаддилардан бу ҳолат бўйича изоҳ олишга ҳаракат қилдик. Аммо уларни учрата олмадик.
Олтиариқ тумани ҳокими фуқароларнинг ўзини ўзи бошқариш органлари фаолиятини мувофиқлаштириш бўйича туман кенгаши раиси сифатида маҳалла тизимига ҳам эътибор қараца бўларди...
Изоҳ (0)